Kalimi i një sistemi frontal drejt territorit shqiptar do të kushtëzojë mot të paqëndrueshëm. Orët e paradites paraqiten me alternime kthjellimesh dhe vranësirash mesatare, ku në zonat veriore – veriperëndimore do të jenë më të dendura duke gjeneruar rrebeshe shiu ndërsa orët e pasdites dhe në vijim do të sjellin reshje shiu në të gjithë Ultësirën Perëndimore si edhe reshje dëbore në zonat malore përgjatë shtrirjes lindore. Gjatë natës pritet intensifikim i reshjeve në të gjithë territorin e vendit.
Temperaturat e ajrit do të pësojnë rritje në orët e mëngjesit, por ulen në mesditë duke luhatur vlerat ditore nga -3°C vlera minimale e shënuar në zonat verilindore deri në 15°C vlera maksimale e cila pritet përgjatë vijës bregdetare. Era do të fryjë mesatare deri e fortë gjatë gjithë ditës duke arritur shpejtësinë maksimale deri në 65 km/h nga drejtimi Jugor. Për pasojë në brigjet detare do të krijohet dallgëzim mbi 4 ballë.
Kosova
Masat ajrore të paqëndrueshme do të përfshijnë edhe republikën e Kosovës, ku vranësirat do të jenë prezente përgjatë gjithë ditës. Pritet që në orët e vona të pasdites dhe në vijim të sjellin shtim të vranësirave duke gjeneruar reshje shiu e dëbore. Problematike do të shfaqen ngricat e theksuara në të gjitha akset rrugore. Temperaturat e ajrit do të pësojnë rritje në mëngjes, por ulen në mesditë duke luhatur vlerat ditore nga -3°C vlera më e ulët në Mitrovicë deri në 8°C vlera më e lartë në qytetin e Prizrenit. Era do të fryjë mesatre paradite, por forcohet gjatë pasdites duke arritur shpejtësinë maksimale mbi 60 km/h nga drejtimi kryesisht jugor.
Maqedoni e Veriut
Masat ajrore të paqëndrueshme do të kushtëzojnë motin edhe në republikën e MV, ku vranësirat dhe kthjellimet afat-shkurtra do të jenë dominante gjatë orëve të para të mëngjesit, por mesdita dhe pasditja do të sjellin shtim të vranësirave duke gjeneruar reshje të dendura shiu e dëbore si edhe stuhi të forta ere në të gjithë territorin e MV.
Ky destabilitet i atmosferës do të na shoqërojë dhe gjatë natës. Për sa i përket temperaturave të ajrit do të pësojnë rritje në mëngjes, por ulen në mesditë duke luhatur vlerat ditore nga -2°C vlera minimale e shënuar në Dibër deri në 10°C vlera maksimale në qytetin e Shkupit. Era do të fryjë mesatare gjatë paradites, por forcohet në pjesën e dytë të ditës duke arritur shpejtesinë maksmale mbi 55 km/h nga drejtimi permanent Juglindor.
Evropa
Ishujt britanikë, Europa qendrore si edhe pjesërisht Ballkani do të përfshihen nga masa ajrore të paqëndrueshme duke sjellë stuhi të forta ere dhe reshje shiu e dëbore, ku më të theksuara reshjet do të jenë në Britaninë e madhe dhe Ballkanin Perëndimor. Po ashtu vendet e Europës Lindore do të jenë nën ndikimin e dy qendrave ciklonare duke kushtëzuar, vranësira, reshje të dendura dëbore dhe ngrica të theksuara ndërsa nën ndikimin e motit të kthjellët dhe të ftohtë do të paraqiten vetëm dy skajet e Europës, gadishulli Iberik si edhe gadishulli Skandinav.
