Presidenti francez, Emmanuel Macron deklaroi se do të diskutojë me aleatët evropianë mundësinë e përdorimit të parandalimit bërthamor të Francës për të mbrojtur kontinentin nga kërcënimet ruse, mes shqetësimeve për mosangazhimin e mundshëm të SHBA-së, sipas AP.
Franca është e vetmja fuqi bërthamore në Bashkimin Evropian.
Macron, në një fjalim televiziv përpara një samiti të posaçëm evropian sot, e përshkroi Rusinë si një “kërcënim për Francën dhe Evropën” dhe tha se ai kishte vendosur “të hapte debatin strategjik për mbrojtjen e aleatëve tanë në kontinentin evropian nga parandalimi ynë bërthamor”.
Ai tha se përdorimi i armëve bërthamore të Francës do të mbetet vetëm në duart e presidentit francez.
Lëvizja e Macron vjen si përgjigje ndaj një shtytjeje nga fituesi gjerman i zgjedhjeve Friedrich Merz, i cili kohët e fundit bëri thirrje për një diskutim mbi çështjen bërthamore franceze.
Udhëheqësit e BE-së do të trajtojnë çështjen e parandalimit bërthamor, midis temave të tjera, gjatë samitit të së enjtes në Bruksel, duke u fokusuar në mbështetjen për Ukrainën dhe mbrojtjen evropiane. Aleatët evropianë të NATO-s kanë llogaritur për dekada në parandalimin e fuqishëm të SHBA-së.
