Vatikani zyrtarizoi vdekjen e papës edhe ne faqen zyrtare të selisë së shenjtë. Sipas procedurave të përcaktuara nga protokollet e selisë së shenjtë, ekzaminimet e zyrtarëve të vatikanit janë kryer dhe tashmë zyrtarizohen. Ky është një proces që udhëhiqet nga Kardinali “Kamerleng” që ka fuqitë ekzekutive të shtetit të Vatikanit dhe shefi i ceremonive liturgjike.
Përfundimi i saj nënkupton se selia e shenjtë tashmë ka vërtetuar se Ati i Shenjtë ka ndërruar jetë së bashku me shkaqet shkencore të vdekjes. Procesi verifikues përfundon me shpalljen e vakancës dhe se tashmë kisha katolike drejtohet nga kolegji i kardinalëve.
Në faqen zyrtare të selisë së shenjtë tashmë foto e Papa Françeskut është listuar poshtë, ngjitur me ato të Papëve të mëparshëm katolikë. Gjithashtu në faqen zyrtare Vatikani shkruan në latinisht: “Apostolica Sedes Vacans”, që do të thotë se Selia Apostolike është e lirë pa një Papë.
