Kolegji i Posaçëm i Apelimit, KPA shpalli të martën më 20 maj vendimin për ndryshimin e vendimit të Komisionit për konfirmimin në detyrë të gjyqtares së Tiranës, Ardiana Bera, duke e shkarkuar atë për probleme të pasurisë.
Konfirmimi në detyrë i Berës nga Komisioni i Pavarur i Kualifikimit më 26 prill të vitit 2024, u ankimua nga institucioni i Komisionerëve Publikë për gjetje në kriterin e pasurisë dhe profesionalizmit. Drejtuesi i SPAK, Altin Dumani që mori kompetencat e Komisionerëve Publikë, u përfaqësua në këtë çështje nga prokurori Adnan Xholi, i cili u qëndroi shkaqeve të ankimit duke vlerësuar se subjekti nuk ariti të provonte të kundërtën e shkaqeve të ankimit lidhur me gjetjet për një apartament me sipërfaqe 136.7 në Tiranë, për gjendjen cash, çeljen e një llogarie në emër të vajzës si dhe për profesinalizimin.
Gjatë leximit të vendimit të përmbledhur të martën, kryesuesja e trupit gjykues, Rezarta Schuetz deklaroi se Kolegji e ka gjetur të drejtë konkluzionin e Komisionerit Publik se Bera nuk ka pasur burime të mjaftueshme për kryerjen e pagesave për partamentin në Tiranë, si dhe për kursimet cash të deklaruara prej saj. Sipas KPA, subjekti nuk arriti të provojë burimin e ligjshëm të huasë 2 milionë lekë të marrë nga vëllezërit, e deklaruar si burim për krijimin e kësaj pasurie, pasi nuk u vërtetua vlera e të ardhurave nga emigracioni.
KPA, ashtu si Komisioneri, vlerësoi se subjekti nuk ka arritur të provojë mundësinë për krijimin e një llogarie në emër të vajzës, duke marrë në konsideratë dhe deklarimin e subjektit se si burim ka shërbyer shuma 1 milion lekë e dhuruar nga vëllezërit, që ka qenë pjesë e huasë 2 milionë lekë, për krijimin e të cilës u konkludua balancë negative.
Sipas Kolegjit, bilancet negative në disa vite në masën totale prej reth 3.1 milionë lekësh, e pamundësojnë zbatimit e parimit të proporcionalitetit. Për rrjedhojë çmohet se subjekti ka bërë deklarim të pamjaftueshëm për pasurinë.
Duke vlerësuar se konkluzioni për pasurinë është i mjaftueshëm për marrjen e vendimit dhe për ekonomi gjyqësore, trupi gjykues i Kolegjit nuk u shpreh lidhur me shkaqet e ngritura nga Komisioneri për aspektin profesional.
Në përfundim, Kolegji vendosi ndryshimin e vendimit të Komisionit dhe shkarkimin nga detyra të gjyqtares Ardiana Bera. Vendimarrja e Kolegjit është përfundimtare dhe ka efekt të menjëhershëm.
Bera e ka filluar karrierën në vitin 1997 dhe deri në vitin 2010 ka ushtruar funksionin si gjyqtare e Gjykatës së Rrethit Gjyqësor Krujë. Në vitin 2010 ajo është transferuar në Gjykatën e Rrethit Gjyqësor Tiranë. Bera njihet nga opinioni publik për gjykimin e çështjes kundër oficerëve të gardës, Ndrea Prendi dhe Agim Llupi, të akuzuar për vrasjen e protestuesve gjatë tubimit të 21 Janarit, 2011.
