Një zhvillim i rëndësishëm vjen nga Komisioni i Ankimimeve dhe Sanksioneve (KAS), ku Partia Demokratike ka kërkuar rinumërimin e votave në të gjithë bashkinë e Tiranës, për partitë dhe kandidatët. Kërkesa është depozituar nga dy anëtarët e PD-së në KAS, Ledio Braho dhe Elvis Çefa, të cilët kanë ushtruar të drejtën që u jep Kodi Zgjedhor për të kërkuar transparencë të plotë mbi rezultatin zgjedhor.
Sipas burimeve zyrtare, kërkesa përfshin rihapjen e të gjitha kutive të votimit në të 1200+ qendrat e votimit të kryeqytetit, duke përfshirë çdo kuti votimi për subjektet dhe preferencat për kandidatët.
Rinumërimi do të nisë menjëherë sapo të përfundojnë përgatitjet logjistike dhe organizative, ndërkohë që pritet të publikohet edhe kalendari zyrtar për procedurën e detajuar. Nuk dihet ende sa kohë do të zgjasë procesi, por përmasat e rinumërimit e bëjnë këtë një ndër ndërhyrjet më të mëdha në historinë e zgjedhjeve lokale në vend.
Burime pranë KQZ-së konfirmojnë se procesi do të zhvillohet në prani të përfaqësuesve të partive politike, vëzhguesve të akredituar dhe përfaqësuesve të medias, në përputhje me standardet e transparencës dhe ligjshmërisë.
