Luciano Spalletti shkarkohet nga detyra e trajnerit të kombëtares italiane, pas humbjes 3-0 ndaj Norvegjisë në ndeshjen kualifikuese për Kupën e Botës. Rezultati negativ ka qenë vendimtar për të ardhmen e teknikut 66-vjeçar.
Lajmin e ka konfirmuar vetë Spalletti, duke bërë me dije se ka zhvilluar një takim me presidentin e Federatës Italiane të Futbollit, Gabriele Gravina, i cili i ka komunikuar largimin nga posti. Trajneri ka shprehur dëshirën për të vijuar në detyrë, por kjo nuk është pranuar nga drejtuesit e federatës.
Spalletti do të jetë në stol edhe për ndeshjen e fundit, atë të 9 qershorit ndaj Moldavisë, pas së cilës do të largohet zyrtarisht nga kombëtarja.
Ndërkohë, kanë nisur spekulimet për pasuesin e tij. Emra si Stefano Pioli dhe Roberto Mancini përmenden ndër më të mundshmit, por vendimi për trajnerin e ri pritet të merret në javët e ardhshme.
