Në ditën e dytë të samitit të NATO-s në Hagë, ku janë mbledhur liderët e 32 shteteve anëtare, zhvillimet marrin një kthesë të rëndësishme. Presidenti amerikan Donald Trump dhe Sekretari i Përgjithshëm i NATO-s, Mark Rutte, dolën me deklarata të forta për të ardhmen e aleancës.
Trump u shpreh se dita e sotme do të shënojë marrjen e disa vendimeve vendimtare për forcimin e NATO-s. “Ne do të marrim disa vendime shumë të rëndësishme sot. NATO do të jetë më e bashkuar dhe më e fortë se kurrë më parë,” deklaroi ai me tone të qarta mbështetëse ndaj aleancës.
Në një prononcim për mediat, Mark Rutte theksoi se ka një konsensus të fortë për të çuar përpara rritjen e buxhetit të mbrojtjes deri në 5% të PBB-së. Ai e lidh këtë zhvillim drejtpërdrejt me rikthimin e Trump në Shtëpinë e Bardhë. “Kjo nuk do të kishte ndodhur pa rikthimin tuaj në detyrë. Zgjedhja juaj në 2016 dhe rizgjedhja e vitit të kaluar e kanë bërë këtë të mundur”, u shpreh Rutte.
Në qendër të vëmendjes ishte edhe situata në Lindjen e Mesme. Trump deklaroi se armëpushimi mes Izraelit dhe Iranit po ecën mirë dhe nënvizoi suksesin e sulmit të fundit në territorin iranian. “Ishte një fitore e madhe, edhe për Iranin në njëfarë mënyre. Ata tani duhet të fokusohen në stabilitet dhe të harrojnë ambiciet për armë bërthamore. Irani nuk do të ketë bombë bërthamore. Kjo është e qartë”, tha ai.
Lidhur me krizën në Ukrainë, Trump bëri të ditur se do të zhvillojë një takim me presidentin Volodymyr Zelensky. “Zelensky po përballet me disa sfida, por është një njeri i mirë. Do ta takoj sot dhe do të diskutojmë hapat e mëtejshëm,” shtoi ai.
Në fokus të samitit janë çështjet kryesore të sigurisë, përfshirë përforcimin e mbrojtjes kolektive, nenin 5 të traktatit dhe mbështetjen ndaj Ukrainës në sfidat që ajo po përballon. NATO po përgatitet për hapa të rëndësishëm që mund të përcaktojnë të ardhmen e aleancës në vitet që vijnë.
