Ish-deputeti i Partisë Demokratike, Ervin Salianji, është liruar sot me kusht nga burgu i Fierit, pas një vendimi të Gjykatës që pranoi kërkesën për lirimin e tij të parakohshëm. Vendimi u mor pas një seance gjyqësore ku, si Shërbimi i Provës, ashtu edhe Burgu i Fierit dhe Prokuroria, dhanë vlerësime pozitive për sjelljen dhe përmbushjen e kushteve ligjore nga ana e Salianjit gjatë vuajtjes së dënimit.
Salianji ka vuajtur 9 muaj nga dënimi prej 1 viti, që i ishte dhënë për kallëzim të rremë në çështjen e njohur si “Babale”, një rast i shumëpërfolur që përfshinte audio-përgjime të publikuara në vitin 2018, ku ai akuzoi vëllain e ish-ministrit të Brendshëm për përfshirje në trafik droge. Dënimi u konfirmua në të gjitha shkallët e gjyqësorit, përfshirë edhe nga Gjykata e Lartë.
Në përfundim të seancës, trupa gjykuese u tërhoq për vendim dhe shpalli lirimin me kusht, i cili hyn në fuqi menjëherë. Avokati i tij, Ledio Braho, tha për mediat se ky vendim vjen si rezultat i përmbushjes së të gjitha kritereve ligjore dhe sjelljes shembullore të klientit të tij në institucionin e vuajtjes së dënimit.
Ervin Salianji do të mbajë një deklaratë zyrtare sot në orën 17:00 nga selia qendrore e Partisë Demokratike, ku pritet të flasë për lirimin, qëndrimin e tij ndaj çështjes “Babale” dhe hapat e mëtejshëm në planin ligjor dhe politik. Burime pranë demokratit bëjnë me dije se ai nuk do të tërhiqet nga pretendimet për pafajësi dhe do të vazhdojë betejën në Gjykatën Evropiane të të Drejtave të Njeriut, ku kërkon të sfidojë vendimin si të motivuar politikisht.
Lirimi i Salianjit është pritur me reagime të ndryshme në arenën politike, ku përkrahësit e tij e konsiderojnë një hap drejt drejtësisë, ndërsa kritikët vijojnë të kërkojnë sqarime për përfshirjen e politikës në sistemin e drejtësisë.
Deklarata e orës 17:00 pritet të jetë një rikthim publik i Salianjit dhe një mesazh politik me peshë nga selia blu.
