TIRANË – Autoriteti Kombëtar i Ushqimit (AKU) i nënshtrohet një “tronditjeje” të plotë. Ministrja e Bujqësisë dhe Zhvillimit Rural, Anila Denaj, ka pezulluar menjëherë të gjitha inspektimet e paautorizuara të këtij institucioni dhe ka ngritur një Komision të Posaçëm për rivlerësimin e trupës inspektuese.
Në një deklaratë publike, Denaj theksoi:
“Ndërpresim çdo inspektim të pakontrolluar – test me shkrim dhe me gojë për çdo inspektor. Vjen një qasje e re, një etikë e re!”
Çfarë përfshin kjo lëvizje?
Urdhri parashikon pezullimin e menjëhershëm të çdo inspektimi që nuk është i planifikuar dhe i miratuar zyrtarisht, ndërsa një Komision me 5 anëtarë, ku 3 vijnë nga Universiteti Bujqësor i Tiranës, do të kryejë një proces të thelluar vlerësimi për të gjithë trupën ekzistuese të AKU-së, si dhe për aplikantët e rinj.
Komisioni do të drejtohet nga prof. Iliri, ndërsa testimet do të jenë në formë të shkruar dhe gojore – një proces që synon të identifikojë aftësitë reale, etikën profesionale dhe përgatitjen teknike të çdo inspektori.
“Ky proces nuk është vetëm kontroll i së shkuarës, por një vlerësim i potencialit të individëve që do të jenë nesër në terren. Duam të ndërtojmë një AKU të besueshme për qytetarët,” – shtoi Denaj.
Çfarë e nxiti këtë vendim?
Pak ditë më parë, kryeministri Rama kërkoi publikisht pezullimin e menjëhershëm të AKU-së, pas ankesave për inspektime të parregullta dhe mungesë transparence. Gjatë një takimi në Cërrik, ai kërkoi ristrukturim të thellë të institucionit.
Masa të forta edhe për bulmetin:
Në një tjetër reagim të fortë nga Durrësi, Rama paralajmëroi se:
“Çdo produkt bulmeti pa faturë do të sekuestrohet nuk ka më paralajmërime!”
Temperaturat e larta të stinës dhe mungesa e kontrollit ligjor përbëjnë rrezik për shëndetin publik, ndaj qeveria ka vendosur të mos tolerojë më asnjë shkelje.
