Akuzat e ish-presidentit Donald Trump ndaj Barack Obamës për tradhti dhe kryengritje janë cilësuar si “të çuditshme” dhe “qesharake” nga zëdhënësi i ish-presidentit demokrat. Patrick Rodenbush theksoi se zyra e Obamës nuk i jep rëndësi dezinformatave që sipas tij vijnë nga Shtëpia e Bardhë, por këto akuza janë një përpjekje e dobët për shpërqendrim.
Më herët gjatë ditës, Trump deklaroi në Zyrën Ovale se do të “ndjekë penalisht personat” që sipas tij përpoqën të ndërhynin në zgjedhjet presidenciale të vitit 2016, duke akuzuar Rusinë për ndikim në rezultat. Hetime të shumta kanë konfirmuar përpjekjet e Rusisë për të ndikuar në zgjedhje në favor të Trump, por nuk ka prova për manipulim të votave.
Trump akuzoi ish-presidentin Obama si udhëheqës të një “komploti tradhtar” për përdorimin e inteligjencës si armë politike dhe pretendoi se dokumente të deklasifikuara nga Drejtoresha e Inteligjencës Kombëtare, Tulsi Gabbard, mbështesin këto pretendime.
Por zyra e Obamës theksoi se asnjë nga dokumentet nuk e sfidon përfundimin e përgjithshëm të inteligjencës amerikane dhe raportit dypartiak të Senatit në vitin 2020, që konfirmon përpjekjet e Rusisë për ndërhyrje, por jo manipulim të votave.
