Në disa zona të Greqisë Perëndimore, zjarret e ndihmuara nga erërat e forta kanë sjellë evakuime urgjente dhe mobilizim të madh forcash zjarrfikëse.
Zjarre të shumta kanë shpërthyer në Greqi të martën në mëngjes, duke detyruar autoritetet të përqendrojnë përpjekjet e tyre në tre vatra të mëdha: në ishujt Zakynthos dhe Kefaloni, si dhe në rajonin më të gjerë të Vonitsës, në Greqinë perëndimore.
Në Zakynthos, flakët po përhapen me shpejtësi mes fshatrave Lithakia, Agala dhe Kiliomenos. I gjithë kapaciteti zjarrfikës i ishullit është mobilizuar. 60 zjarrfikës me 17 automjete, dy ekipe tokësore dhe dy avionë ujëhedhës.
Autoritetet kanë lëshuar alarm evakuimi për banorët e Agalës, të cilëve u është kërkuar të largohen. Mediat vendase, përfshirë SkyNews, raportuan se të paktën një hotel në zonën Apelati është evakuuar.
Në ishullin e Kefalonisë, zjarri ka shpërthyer rreth orës 03:00 të mëngjesit në zonën Faraklata, por autoritetet theksojnë se flakët janë ende larg zonave të banuara.
Zjarri i tretë i madh shpërtheu në zonën pyjore të Paliambela, në Vonitsa, i nxitur nga erëra të forta. Banorëve të fshatit Varko u është kërkuar të jenë gati për evakuim drejt Paliambelës.
Në zonë po punojnë për shuarjen e flakëve 85 zjarrfikës, 27 automjete, tre ekipe tokësore, nëntë avionë dhe një helikopter. Sipas kryebashkiakut Athanasios Kasolas, një shtëpi është konfirmuar e djegur nga flakët.
