Ish-presidenti Bill Clinton, 79 vjeç, ka rikthyer shqetësimet për shëndetin e tij pas një paraqitjeje publike me një defibrilator gjatë largimit nga Hamptons.
Ai u pa duke mbajtur një njësi të transportueshme ‘Propaq MD Air Medical Bag’ – një monitor dhe defibrilator i lehtë për transport – në aeroport të enjten.
Clinton mbante një xhaketë blu dhe një kapelë bezhë teksa doli nga automjeti, duke u shoqëruar nga ekipi i tij i sigurisë. Gruaja e tij, Hillary, ish-sekretare e Shtetit, kishte veshur një bluzë të zezë mbi setin e saj blu me dy pjesë për udhëtimin me avion.
Shëndeti i ish-presidentit ka qenë në qendër të vëmendjes vitet e fundit, ndërsa dikur energjiku demokrat është plakur dukshëm. Vitin e kaluar, ai doli nga spitali natën e Krishtlindjes pasi u trajtua për grip.
Më 23 dhjetor, Clinton u shtrua në ‘MedStar Georgetown University Hospital’ në Uashington dhe iu nënshtrua testeve shtesë pas shfaqjes së etheve.
Në të kaluarën, Clinton ka pasur disa probleme serioze shëndetësore. Në vitin 2004 iu nënshtrua një bajpasi të katërfishtë të zemrës, pasi disa nga arteriet e tij ishin pothuajse të bllokuara 100%.
Mjekët thanë se ai kishte shpëtuar me fat nga një atak i madh në zemër. Në vitin 2010, ai shfaqi shqetësim në kraharor dhe iu vendos një stentë në arterien e tij në të njëjtin spital. Në vitin 2021, u shtrua në spital pas një infeksioni urologjik që u përhap në gjak.
Clinton-ët kanë qenë në qendër të mediave edhe për hetimin mbi Jeffrey Epstein. Më 5 gusht, ata morën thirrje nga Kongresi si pjesë e hetimit kongresional mbi mënyrën se si qeveria trajtoi çështjen e financierit.
As Bill, as Hillary nuk janë nën hetim aktualisht, por deklaratat e tyre mund të shqyrtojnë lidhjet midis Epstein dhe figurave të shquara. Bill pritet të dëshmojë më 14 tetor, dhe Hillary më 9 tetor, megjithëse nuk dihet nëse do t’i përmbahen thirrjeve.
Në memuarin e tij që doli vitin e kaluar, Bill pranoi se kishte fluturuar me avionin privat të Epstein, por tha se nuk kishte njohuri për krimet e tij dhe shprehu pendesë që e kishte takuar.
Ai theksoi se udhëtimi me avionin nuk ia vlente vitet e spekulimeve dhe pyetjeve që pasuan: “Në thelb, edhe pse më lejoi të vizitoja projektet e fondacionit tim, udhëtimi me avionin e Epstein nuk ia vlente vitet e pyetjeve që pasuan. Do doja të mos e kisha takuar kurrë.” (Daily Mail)
