Departamenti i Drejtësisë ka publikuar transkripte të intervistave me Ghislaine Maxwell, ish-të dashurën e burgosur të Jeffrey Epstein. Zbulimi vjen mes presionit të vazhdueshëm ndaj administratës Trump për të treguar transparencë, pasi më parë kishte refuzuar të bënte publike dokumente të tjera rreth çështjes së trafikimit seksual.
Maxwell, e dënuar në vitin 2021 për ndihmën ndaj Epstein në abuzimin seksual të vajzave adoleshente, u intervistua muajin e kaluar nga zëvendës prokurori i përgjithshëm Todd Blanche. Në transkripte, ajo përmend se mund ta ketë takuar Presidentin Trump në vitin 1990, kur babai i saj, manjati Robert Maxwell, ishte pronar i New York Daily News. Ajo shtoi se babai i saj e pëlqente shumë Trumpin dhe ishte mik me të.
Pas intervistës, Maxwell u transferua nga një burg federal i sigurisë së ulët në Florida në një kamp burgu të sigurisë minimale në Teksas, megjithëse arsyeja e transferimit nuk është bërë publike.
Fshehje apo transparencë?
Publikimi i transkripteve duket si një përpjekje e administratës Trump për të zbutur zemërimin e publikut dhe mbështetësve të saj. Rasti Epstein ka tërhequr vëmendje të gjerë për shkak të lidhjeve të tij me figura të njohura si Princi Andrew, Bill Clinton dhe Donald Trump.
Për muaj me radhë, zyrtarë të administratës dhe figura mediatike kishin nxitur pritshmëritë për zbulime bombastike, duke lënë të kuptohej se ekzistonte një “listë klientësh” ose prova të një “mbulimi” qeveritar.
Këto pretendime u hodhën poshtë më vonë nga FBI dhe Departamenti i Drejtësisë, duke shkaktuar përçarje të brendshme dhe zemërim te baza e Trump, i cili i quajti mbështetësit e tij “të dobët” për besimin te “mashtrimi i Jeffrey Epstein”.
