Në fshatin malor të Lufajt në Mirditë, një dëshmi e fortë emocionale tregon sesi jeta e komunitetit është transformuar pas ndërtimit të HEC-it dhe infrastrukturës që erdhi bashkë me të. Një banor i zonës, Ndoc Kaçorri, rrëfen se për vite të tëra banorët jetuan pa rrugë e pa ujë, në një izolim total, ku edhe ushqimet i sillnin me mushka dhe thesët u çaheshin nëpër ferra.
“Me thënë të drejtën në këtë fshat kemi qenë pa rrugë edhe ne merrnim furnizimin ku merrnim ushqimin dhe na çaheshin thesët nga rruga dhe nga shkurret se i sillnim me mushka. Falë ardhjes së HEC-it, firmës ‘Trebicka’ na kthyen këtë rrugë që lidh gjithë fshatrat. Rruga erdhi që në 2014 kur erdhi HEC-i. E kam pas nënën duke vdekur dhe më thotë ‘O bir më ngihni në krah ta shoh këtë rrugë se është rregulluar’ dhe u kënaq pa masë. Erdhi rruga, nuk na bëri keq rruga. Me kërkesën tonë i thamë të lëri ujin, edhe këtu jemi 20 familje, 6 shtëpi po që na la ujin.”-shprehte Ndoc Kaçorri.
Kjo dëshmi nuk është vetëm një kujtim i dhimbshëm personal, por edhe një pasqyrë e realitetit që ka përjetuar i gjithë komuniteti. Rruga, që dikur ishte e pakalueshme, sot lidh fshatrat me njëri-tjetrin dhe me qytetet përreth. Janë ndërtuar rreth 20 kilometra rrugë të reja, që mundësojnë qarkullimin me automjete dhe lehtësojnë jetën e përditshme të banorëve.
Ndërkohë, një tjetër përfitim kyç për fshatin ka qenë uji një luks për shumë vite me radhë. Sipas një reportazhi të Lexo.al, i realizuar nga botuesi Flogert Muça dhe me pjesëmarrjen e pedagogut Bardhyl Muceku, aktualisht HEC-et në zonë janë jashtë funksionit energjetik dhe po përdoren vetëm për të furnizuar komunitetet me ujë të bollshëm. Uji merret pa prekur burimet lokale, duke respektuar rrjedhën ekologjike, dhe përmes tunelit të HEC-it, mbërrin deri në Lufaj një fshat që më parë nuk kishte asnjë mundësi ta përdorte.
