Pas dorëzimit të komenteve në Gjykatën Kushtetuese lidhur me procesin e konstituimit të Kuvendit të Kosovës, Presidentja Vjosa Osmani ka deklaruar se po bllokohet funksionimi i shtetit për shkak të moszgjedhjes së nënkryetarit të Kuvendit.
“Po synohet që për një nënkryetar, të bllokohet shteti në tërësi sepse një shtet pa institucione është shtet i dështuar”, tha Osmani në një konferencë për media.
Ajo shtoi se vonesa në konstituimin e Kuvendit dhe moszgjedhja e kryetarit rrezikojnë seriozisht funksionimin institucional dhe themelet e Republikës së Kosovës. Për postin e nënkryetarit që i takon komunitetit serb, Osmani deklaroi se ai pozicion do të mbetet i zbrazët për momentin, pa penguar procesin e konstituimit.
“Kur Kryesia ka kuorum dhe kryetar, dhe deputetët kanë kryer betimin, bllokimi për një post të vetëm pamundëson përfaqësimin legjitim të qytetarëve dhe ushtrimin e sovranitetit,” theksoi ajo.
Presidentja Osmani paralajmëroi se me të drejtat e komuniteteve nuk mund të abuzohet në mënyrë që të bllokohet funksionimi i institucioneve. Ajo kujtoi se Lista Serbe më herët është larguar nga institucionet pa penguar funksionimin e shtetit dhe kërkoi nga Gjykata Kushtetuese të mos lejojë veto mbi proceset jetike të shtetit.
“Veto mbi Republikën nuk ka qenë kurrë qëllim i Kushtetutës. Të jepet e drejta e vetos një partie që përfaqëson një komunitet do të zhvleftësonte Republikën në një copë letre,” përfundoi Osmani.
