Nga Mero Baze/
I kapur në befasi nga zgjedhjet në Tiranë, sapo kishte krijuar rehatinë brenda PD, Sali Berishës tani i duhet të ndërtojë një skemë se si të heqë qafe kandidatët nga jashtë PD që po i imponohen në këto zgjedhje. I qartë se mosarritja e një aleance me partitë e tjera do t’i japë një rezultat katastrofik, ai po përpiqet t’ua djegë kandidatët me qëllim që ata të mbështesin kandidatin e tij, i cili do të jetë dikush që nuk i prish punë brenda PD.
Pas mbledhjes së sotme të kryesisë ai tha se “do të shikojmë se kush do të vetkandidohet i pavarur për të vendosur nëse do ta mbështesim”. Pra, u ka lënë dy ditë kohë pretendentëve jashtë PD të vetofrohen si kandidatë të pavarur që do të mbështeten nga PD, e pastaj ai të zgjedhë kë i bën punë. Ky proces, i cili natyrisht nuk do të ndodhë, synon të diskreditojë paraprakisht kandidatët dhe t’i fusë në një proces seleksionimi poshtërues, me qëllim që t’ua heqë nga duart partive të tjera opozitare.
Shpresoj që askush të mos bjerë në këtë kurth. Dhe nuk besoj se ka shanse.
Pas dy ditësh Berisha do të jetë përsëri pa kandidat dhe do të ofrojë dikë nga brenda PD. I vetmi ndryshim është se do të thotë: “Siç e patë, nuk ka të tjerë përveç PD që duan të kandidojnë.”
Ashtu sikundër i kam sugjeruar edhe një ditë më parë kandidatit Ermal Hasimja, ai duhet të shpallë kandidaturën nëse ka ndërmend të kandidojë, pa u përfshirë në negociata me PD. Nëse shpallja e kandidaturës kushtëzohet nga negociatat me PD, ai thjesht është duke konsumuar një proces poshtërimi dhe dëshpërimi, si për vete ashtu edhe për kandidatët e tjerë. Është PD ajo që lufton për kandidat fitues dhe ajo duhet të bëjë llogaritë se kush e dëmton në fushatë, jo partitë e vogla. Partitë e vogla luftojnë të formojnë profilin e tyre në politikë.
Fjala vjen, Arlind Qorri është i qartë në vendimmarrjen e vet. Do të kandidojë vetë si kandidat për kryetar bashkie, si përfaqësues i një partie të majtë, duke synuar elektoratin e zhgënjyer të Partisë Socialiste.
Të njëjtën qartësi duhet të kenë edhe partitë e dala nga PD. Nëse ata duan t’i imponohen PD, nuk mund t’i imponohen me negociata, por me kandidatë të mirë. Pastaj PD të bëjë llogaritë e veta.
E vërteta është se PD nuk lufton të fitojë Bashkinë, por lufton për të mos u turpëruar më keq se në zgjedhjet e tjera. Kjo është arsyeja që ata as kanë kandidatë dhe as duan që të tjerët të kenë kandidatë. PD-së i duhet pushteti në opozitë, jo pushteti në Tiranë. Dhe të gjitha lëvizjet e Berishës janë për të mos i marrë opozitën, jo Tiranën. Tiranën e ka Edi Rama dhe ai nuk ndjehet keq për këtë gjë. I vetmi hall i tij është se mos i ndërhyjnë në tortën e opozitës dhe i marrin ndonjë pjesë. Vetëm për këtë është gati të negociojë. Ndaj ka nisur t’i dëshpërojë kandidatët e tjerë jashtë PD, duke u kërkuar të vetkandidohen dhe pastaj t’i përzgjedhë ky. A thua se ata do bëjnë pasarelë mode për dy ditë dhe pastaj juria do shpallë më të bukurin.
Është thjesht një proces poshtërimi i tyre dhe rikthim tek kandidatët e tij politikë, anonimë. Pak a shumë siç bëri kur zgjodhi president Bujar Nishanin, kur deri në fund bënte sikur do zgjidhte Xhezair Zaganjorin dhe Artan Hoxhën, pasi ishte siguruar që do t’i skualifikonte të dy.
