Greqia, sipas mediave greke, po përgatit një udhërrëfyes të ri për marrëdhëniet me Shqipërinë, i cili pritet t’i dorëzohet Ministres së Jashtme shqiptare, Elisa Spiropali, gjatë vizitës së saj të parë zyrtare në Athinë më 16 dhjetor.
Kjo do të jetë vizita e parë e kryediplomates shqiptare në kryeqytetin grek që prej marrjes së detyrës.
Sipas mediave greke, në krye të axhendës së takimit mes dy ministrave do të jenë zhvillimet mbi “Çështjen e Detit”, konkretisht përcaktimi i Zonës Ekonomike Ekskluzive, një temë që mbetet ende e pazgjidhur mes Tiranës dhe Athinës.
Në vitin 2020, të dyja vendet ranë dakord t’i drejtohen Gjykatës Ndërkombëtare të Drejtësisë në Hagë. Megjithatë, dosja ka mbetur pezull, pasi pritet ende mandati zyrtar i presidentit për ekipin që do të përfaqësojë Shqipërinë në proces.
Përveç çështjeve dypalëshe, në udhërrëfyesin e ri pritet të theksohet edhe procesi i integrimit evropian të Shqipërisë, si dhe forcimi i ndërlidhjeve mes dy vendeve.
Shqipëria ka shpallur synimin që të mbyllë negociatat e anëtarësimit në BE deri në vitin 2027 një vit kur Greqia do të mbajë Presidencën e radhës së Këshillit Evropian gjatë gjysmës së dytë, duke i dhënë marrëdhënieve dypalëshe një rëndësi të veçantë në këtë periudhë.
Fokus në Ballkanin Perëndimor
Gjatë darkës informale të djeshme në Bruksel, ku mori pjesë edhe Giorgos Gerapetritis në kuadër të Këshillit të Punëve të Jashtme i cili mblidhet sot për të diskutuar zhvillimet në Lindjen e Mesme, Ukrainë, Sahel dhe Sudan Ballkani Perëndimor ishte në qendër të diskutimeve. Ministri i Jashtëm grek u shpreh para homologëve të tij për qëllimin e Greqisë, në kuadër të presidencës së saj të BE-së, për të marrë iniciativën lidhur me trajektoren evropiane të Ballkanit Perëndimor, në përputhje me vizionin që do t’u prezantohet popullatave të rajonit.
Përmes ministrit të saj të jashtëm, Ministria e Jashtme Greke bëri të qartë se e konsideron thelbësore vendosjen e Ballkanit Perëndimor si një prioritet në axhendën presidenciale, duke pasur parasysh situatën komplekse të rajonit për shkak të tensioneve në rritje dhe valës së nacionalizmit.
Sipas politikës së jashtme greke, zgjerimi i BE-së përmes integrimit të Ballkanit Perëndimor është një çështje me ndjeshmëri të lartë, që synon përshpejtimin e procesit të nisur 22 vjet më parë me iniciativën greke dhe Axhendën e Selanikut, siç theksoi së fundmi Gerapetritis në Samitin e Procesit të Berlinit në Londër. Aktualisht, Shqipëria dhe Mali i Zi kryesojnë garën për anëtarësim, ndërsa Athina thekson mbështetjen e saj për procesin dhe rëndësinë e përfundimit të të gjitha hapave të pranimit në respekt të plotë të ligjit të BE-së, ligjit ndërkombëtar, demokracisë dhe marrëdhënieve të fqinjësisë së mirë.
