Në vitin 2007, kur Berisha ishte në pushtet dhe brenda PD po e përqendronte pushtetin vetëm tek rrethi i tij familjar, Bujar Leskaj sajoi një drekë në Radhimë me Bamir Topin dhe si padashje edhe rreth 30 deputetë të PD. Edhe pse formalisht u quajt drekë pune mes kolegësh, alarmi ishte i madh. Aq i madh sa Sali Berisha u detyrua disa muaj më pas ta bënte Bamir Topin president, ndërkohë që nuk kishte pranuar ta bënte as kryetar të PD së Tiranës. Për të shmangur rrezikun e çarjes së grupit dhe humbjes së pushtetit e hoqi qafe me “ngritje”. E gjithë kjo vetëm nga një drekë.
Në një farë mënyre i doli mirë. Po ta kishte nënvlerësuar do ikte nga pushteti pa ndodhur dhe Gërdeci.
E njëjta skenë frike dhe paniku po përsëritet dhe tani vetëm nga një kafe. Më të votuarit e PD të mbetur pas dere shikojnë se si janë keqpërdorur nga Berisha dhe u mblodhën të pinë një kafe të diskutojnë se çfarë bëjnë për të ruajtur përfaqësimin e tyre në PD.
Gjithë qentë e gjahut të Berishës janë vërsulur t’i poshtërojnë, t’i shqyejnë dhe në fund edhe t’i injorojnë, duke u vënë gjithë epitetet e mundshme nga “zhigolo” tek “besëprerë”. Vetëm Berisha nuk po nxitohet. Ai e ka ndjerë më shumë se qentë e tij të gjahut frikën dhe po përpiqet ta kthejë në favor të tij duke i integruar brenda sistemit të tij, që nënkupton, t’u japë ndonjë kockë dhe t’i bëjë rehat.
Nëse e vini re ai po i fton për kafe në zyrë, po rehabiliton atë demokraten e Kamzës qw zboi Flamuri, duke premtuar se do ta shqyrtojë përjashtimin e saj, etj.
Por nëse më 2007 kishte çfarë t’u jepte se ishte në pushtet, tani thjeshtë mund t’i gënjejë me poste në opozitë të përjetshme, duke qenë vetë kryetar. Pra ata mund të qetësohen se mund t’i zënë vendin Albanës, Mulit, Palokës apo Gaz Bardhit, por me Berishën kryetar ata do të jenë nëpunës opozite.
Ndaj varet se çfarë kërkojnë ata, jo çfarë ofron Berisha. Berisha ka aq përvojë se si zhduken disidentët brenda PD, nëse ai mbetet kryetar. Ai nuk toleron vetëm ata që i kërkojnë kokën atij.
E gjithë kjo zhurmë rreth kafesë do të zhduket shpejt, nëse ata pranojnë pazarin e Berishës. Ai nuk ka problem të ndërrojë gomarët e lodhur me kuaj. Madje këta të fundit i bëjnë më shumë punë për të qëndruar përjetësisht në atë karrige. Puna është nëse do të ketë një lëvizje që ta detyrojë Berishën të dorëhiqet ajo? Për t’ia reformuar stafin besoj se është gati. E ka bërë dhe herë tjetër./TEMA
