Kryeministri Edi Rama komentoi vizitën zyrtare të zhvilluar disa ditë më parë në Doha të Katarit ku u prit nga kryeministri Mohammad bin Abdulrahman bin Jassim Al Thani.
Rama tha se kjo vizitë do të pasohet nga një tjetër e sheikut në Shqipëri në fillim të vitit të ardhshëm. Ndër të tjera Rama bëri me dije se një shërbim prestigjioz spitalor do të integrohet në Shqipëri, pjesë kjo e bashkëpunimeve mes Shqipërisë dhe Katarit.
“Para pak ditësh vizitova Dohën dhe kalova disa orë intensive diskutimesh me mikun tim të shtrenjtë, Kryeministrin e Katarit, Sheikun Muhamed bin Abdulrahman bin Jassim Al Thani, një ndër udhëheqësit më të talentuar e më të respektuar të botës së sotme, i cili do të vijë me shumë dëshirë në Shqipëri në muajt e parë të vitit të ri. Prekëm shumë tema me Kryeministrin dhe do të përgatisim një agjendë ambicioze bashkëpunimi, që do ta bëjmë publike gjatë vizitës së tij në Shqipëri, por mund të them qysh sot se do të sjellim në vendin tonë një ndër ekselencat më prestigjioze të shërbimit spitalor, qoftë si praktikë private e qoftë si praktikë partneriteti publik–privat, çka do të ndikojë shumë pozitivisht në rritjen e standardeve të shërbimit tonë publik spitalor”, tha Rama.
Kryeministri Edi Rama foli dhe për samitin e zhvilluar këtë javë në Shqipëri ku liderët e Ballkanit Perëndimor u mblodhën në Tiranë në prezencën e komisioneres për Zgjerim, Marta Kos për të diskutuar më tej mbi integrimin në BE dhe në tregun ekonomik.
“Edhe këtë javë Shqipëria u bë mikpritëse e një samiti europian, këtë herë mes vendeve të rajonit dhe Komisionit Europian, për Planin e ri të Rritjes, ku së bashku me liderët e Ballkanit Perëndimor dhe Komisioneren Europiane për Zgjerimin, miken e paçmuar të Shqipërisë, Marta Kos dhe skuadrën e saj të ekspertëve, bëmë një bilanc të ecurisë së planit të ri të rritjes, ndamë pikëpamje të vlefshme për integrimin e mëtejshëm ekonomik në rajon dhe integrimin tonë si rajon në Tregun e Përbashkët Europian. Shqipëria tanimë nuk ndalet dot nga askush dhe për asnjë arsye, ndërkohë që kuotat e saj ndërkombëtarisht vazhdojnë të rriten, me shumë punë këtu në Shqipëri e me shumë krenari e dinjitet në përfaqësimin e Shqipërisë në arenën ndërkombëtare”, tha kryeministri.
