Kupa e Botës për Ski Alpine këtë fundjavë ndalesën e katërt të këtij sezoni do e ketë në SHBA, konkretisht në Malet Copper në Colorado. Më 29 dhe 30 nëntor do garohet në disiplinat e Slalomit dhe Slalomit Gjigant, ndërsa Shqipëria do përfaqësohet në të dyja ditët nga Lara Colturi.
Pas dy podiumeve në garat e para, Lara Colturi kërkon të bëjë surprizën në shtëpinë e Mikaela Shiffrin, ‘Mbretëreshës’ së këtij sporti me 103 podiume në karrierë. Colturi u rendit e dyta në Levi të Finlandës dhe po e dyta në Gurgl të Austrisë, me synimin që është t’i prishë festën Shiffrin.
Sezonin e kaluar, po në Copper, skiatoria amerikane u skualifikua pasi u rrëzua në zbritjen e dytë. Ndërsa Lara Colturi u pozicionua në vendin e 9-të në Slalomin Gjigant dhe e teta në Slalom.
Sot garohet në Slalom Gjigant, me lëshimin e parë që do jetë në orën 18:00, ndërsa lëshimi i dytë në orën 21:00 me atë shqiptare. Të dielën garohet në Slalom dhe oraret nuk ndryshojnë.
Me 196 pikë në total pas tre garave të para, Lara Colturi mban për momentin vendin e dytë në renditjen e përgjithshme. E para me 250 pikë Mikaela Shiffrin.
