Qytetarët e Vlorës iu drejtuan sot kutive të votimit për të zgjedhur kryetarin e ri të bashkisë, në kuadër të zgjedhjeve të pjesshme lokale, që po zhvillohen në pesë bashki të vendit.
Ekipi i Agjencisë Telegrafike Shqiptare (ATSH) ndoqi nga afër procesin e votimit në Vlorë, në Qendrat e Votimit 4463 dhe 4463/1, ku në total në këto qendra votimi numri i qytetarëve me të drejtë vote është 1 839.
Procesi i votimit nisi në orën 07:00 dhe do të vijojë deri në orën 18:00 në 232 Qendra Votimi. Referuar të dhënave të Komisionit Qendror të Zgjedhjeve, në Vlorë janë 171 895 qytetarë me të drejtë vote.
Nga vëzhgimi në terren, procesi i votimit vijon normalisht dhe deri në orët e paradites është zhvilluar i qetë dhe pa problematika.
Për ATSH-në anëtar të Komisionit të Qendrës së Votimit, në qendrat e votimit në shkollën “Ali Demi” theksuan se procesi ka vijuar normalisht, ndërsa pjesëmarrja nuk ka qenë shumë e lartë.
Nga vëzhgimi në terren në Qendrat e Votimit 4498, 4496 dhe 4496/1 në shkollën Industriale “Pavarësia” me numër total qytetarësh me të drejtë vote 1980, nga anëtarët e Komisionit të Qendrës së Votimit konstatohet pjesemarrje e ulët. Procesi i votimit sipas tyre ka vijuar pa probleme.
Në garë për kryetar bashkie në qytetin e Vlorës janë Brunilda Mersini nga Partia Socialiste, Dionis Sota kandidat i Pavarur, i mbështetur nga Partia Demokratike dhe Gjergji Nika, kandidat i pavarur.
Zhvillimi i zgjedhjeve të parakohshme në Vlorë u bë pas dorëheqjes së kryetarit të mëparshëm të bashkisë, Ermal Dredha.
Pas mbylljes së qendrave të votimit, do të nisë menjëherë procesi i numërimit të votave.
Zgjedhjet po mbahen sot edhe në bashkinë e Beratit, Cërrikut, Matit dhe Tepelenës.
