Në Këshillin e lartë të Prokurorisë ka nisur seanca dëgjimore për të zgjedhur kreun e Prokurorisë së Posaçme mes 4 kandidatëve: Adnan Xholi, Doloreza Musabelliu, Elvin Gokaj dhe Klodian Braho.
I pari që ka shpalosur platformën e tij ishte prokurori Adnan Xholi.
Xholi vlerësoi punën e Prokurorisë së Posaçme ndërsa theksoi se ka ardhur koha që SPAK të kryejë hetime më të shpejta për t’i dhënë fund kulturës së pandëshkueshmërisë dhe për të rritur besimin e publikut ndaj sistemit.
“E ndjeva privilegjin të aplikoja për shkak se vlerësoj se nga ana formale plotësoj kriteret që përcakton KLP për ngritjen në detyrë, me besimin se kam aftësitë e duhura profesionale për të drejtuar një nga institucionet më të rëndësishme të reformës në drejtësi. Shpreh vlerësimet maksimale ndaj trupë së SPAK për rezultatet që kanë arritur pasi secili prej tyre është kandidat potencial për ta drejtuar atë strukturë. Kanë arritur rezultate konkrete në luftën kundër kriminalitetit, krenar që punoj me ata dhe do t’i mbështes në çdo situatë pavarësisht votimit të sotëm. Ata janë familje ime në sistemin e drejtësisë, më tepër qëndrojmë me ta se me familjen biologjike, ka ardhur koha që të vijohet me hetime në kohë të shpejtë për të goditur kriminalitetin si me hetime penale edhe pasurore, me qëllim sekuestrimin e aseteve të krimit, për të çrrënjosur kulturën e pandëshkueshmërisë dhe promovimin e barazisë para ligjit për të gjithë qytetarët”, tha Xholi.
