Kryeministri Edi Rama ka reaguar ashpër pas deklaratës së Shoqatës së Gjyqtarëve të Shqipërisë, e cila akuzoi kreun e qeverisë për “presion” ndaj Gjykatës Kushtetuese. Në një qëndrim publik, Rama tha se Shoqata gabon rëndë kur e cilëson reagimin e tij si presion, duke theksuar se nuk i ka parë të reagojnë ndaj të tjerëve që, sipas tij, “prej vitesh u këndojnë librin e shtëpisë njerëzve të drejtësisë”.
Kryeministri u shpreh se prej një dekade është angazhuar për mbështetjen e drejtësisë së re dhe pavarësisë së saj, edhe kur, siç tha ai, ka heshtur për “lajthitje të dhimbshme” të sistemit gjyqësor. Rama theksoi se nuk ka ndërmend të mbyllë gojën, as edhe kur është palë në një proces kushtetues, pasi funksioni i tij – i zgjedhur, sipas tij, nga afro 1 milionë shqiptarë – është “goditur në pavarësinë e vet nga një prokuror dhe një gjykatës”.
Ai kritikoi ashpër edhe kërkesën e përsëritur të Shoqatës së Gjyqtarëve për rritjen e pagave me vendim të Gjykatës Kushtetuese, duke e quajtur “skandaloze”. Rama tha se nuk do të përsërisë heshtjen e tij të mëparshme lidhur me vendimin që ai e cilësoi “befasisht të turpshëm”, ndërsa akuzoi Shoqatën se po përpiqet të anashkalojë qeverinë dhe parlamentin për të marrë “një rritje të re prej 1600 eurosh plus pagës aktuale” nga buxheti i shtetit.
Megjithatë, kreu i qeverisë deklaroi se mbetet i hapur për komunikim institucional me Shoqatën e Gjyqtarëve, duke shtuar se pavarësia e gjyqësorit duhet mbrojtur jo vetëm nga ndërhyrjet e jashtme, por edhe nga “krimbi i brendshëm i papërgjegjshmërisë së gjyqtarëve”, që sipas tij dëmton besimin e qytetarëve te drejtësia.
DEKLARATA E RAMËS:
Shoqata e Gjyqtarëve ka bërë deklaratë për t’u ankuar për “presionin” tim ndaj Kushtetueses. Dy mundësi ka këtu: Ose nuk e dinë kuptimin e fjalës presion, sepse nuk i kam parë të ankohen për ca të tjerë, që prej vitesh u këndojnë librin e shtëpisë njerëzve të drejtësisë, ose e dinë që kur ankohen për mua, nuk u hyn gjemb në këmbë, sepse unë jam ai që kam 10 vjet që nuk luftoj me ta, po luftoj për ta – madje duke i përtypur në heshtje, si çështje të pavarësisë së shpallur botërisht me Reformën në Drejtësi, edhe jo pak “lajthitje” të dhimbshme të gjyqësorit, në dëm të lirive e të drejtave të njerëzve të këtij vendi dhe të interesave të këtij shteti. Mirëpo gabon shumë Shoqata e Gjyqtarëve, nëse pret që unë të mbyll gojën e të mos ndaj me publikun opinionin tim, as edhe kur jam vetë palë në një gjyq kushtetues, për shkak se funksioni që mbuloj, me votat e afro 1 milionë shqiptarëve, është goditur në pavarësinë e vet nga një prokuror e një gjykatës dhe rrezikon të gjymtohet për sot e për të ardhmen në shtyllën e vet kurrizore. Jo vetëm kaq, po Shoqata e Gjyqtarëve duhet ta dijë, që do të gabonte po kaq shumë sikur të priste heshtjen time për kërkesën e saj skandaloze dhe të përsëritur, ndaj Gjykatës Kushtetuese, për (ri)rritjen e pagave të gjyqtarëve me vendim gjykate, duke rrëmbyer kompetencat e qeverisë e të parlamentit. Heshtja ime herën e parë, përpara se sa të merrej ai vendim befasisht i turpshëm, nuk do të përsëritet këtë herë, kur me (ri)kërkesën në fjalë, shoqata e gjyqtarëve po tenton të marrë nga buxheti i shtetit, duke anashkaluar qeverinë dhe parlamentin, një rritje të re prej plot 1600 Eurosh – po po, 1600 Euro plus pagës aktuale – të pagave të magjistratëve e të këshilltarëve të tyre. Në ndërkohë, unë dhe qeveria e shumica parlamentare që kam nderin të udhëheq, mirëpresim krahëhapur çdo komunikim institucional me shoqatën në fjalë, për të adresuar nevojat e sfidat e drejtësisë së re, ku parimi i shenjtë i pavarësisë së gjyqësorit, duhet mbrojtur me çdo kusht jo vetëm nga ndërhyrjet e jashtme të kujtdoqoftë, përfshirë dhe mua vetë, po edhe nga krimbi i brendshëm i papërgjegjshmërisë së gjyqtarëve, i cili bren përditë besimin e popullit tek drejtësia.
