Ish-Presidenti i SHBA-së, Bill Clinton, ka dënuar ashpër vrasjet “që po ndodhin në Minneapolis dhe në komunitete të tjera”, duke u bërë thirrje amerikanëve të mos dorëzojnë liritë e tyre të fituara gjatë 250 viteve demokraci.
Kjo është një nga deklaratat më të ashpra të bëra nga një ish-president ndaj gjendjes së tanishme në Shtetet e Bashkuara. Më poshtë, reagimi i plotë:
Në javët e fundit, kemi parë skena të tmerrshme që po ndodhin në Minneapolis dhe në komunitete të tjera, të cilat kurrë nuk do ta kisha menduar se mund të ndodhnin në Amerikë. Njerëz, përfshirë fëmijë, janë rrëmbyer nga shtëpitë e tyre, nga vendet e punës dhe nga rruga nga agjentë federalë të maskuar. Protestues paqësorë dhe qytetarë që ushtronin të drejtën e tyre kushtetuese për të vëzhguar dhe dokumentuar veprimet e forcave të rendit janë arrestuar, rrahur, gazuar me gaz lotsjellës dhe, më tronditësja, në rastet e Renee Good dhe Alex Pretti, janë qëlluar dhe vrarë.
E gjithë kjo është e papranueshme dhe duhej të ishte shmangur. Për ta bërë situatën edhe më të keqe, në çdo hap, njerëzit në pushtet na kanë gënjyer, na kanë thënë të mos besojmë atë që kemi parë me sytë tanë dhe kanë shtyrë taktika gjithnjë e më agresive dhe antagoniste, përfshirë pengimin e hetimeve nga autoritetet vendore.
Gjatë jetës, përballemi vetëm me pak momente kur vendimet që marrim dhe veprimet që ndërmarrim do të formësojnë historinë tonë për shumë vite në vijim. Ky është një prej tyre. Nëse i dorëzojmë liritë tona pas 250 vjetësh, mund të mos i rimarrim kurrë më.
I takon secilit prej nesh që beson në premtimin e demokracisë amerikane të ngrihet, të flasë dhe të tregojë se vendi ynë ende u përket Ne, Popullit.
