Gjatë orëve të fundit, disa familje, përfshirë edhe fëmijë, kanë mbetur të bllokuara në segmente të ndryshme rrugore në Qarkun e Shkodrës, për shkak të reshjeve të dendura dhe ngricave që po rëndojnë qarkullimin.
Sipas raportimeve nga terreni, bllokime janë evidentuar nga zona e Bunit të Bajraktarit deri në drejtim të qytetit të Koplikut, ku aktualisht mbi 200 mjete po përpiqen të lëvizin.
Reshjet e alternuara të breshërit me dëborë dhe ngricat e formuara kanë vështirësuar ndjeshëm qarkullimin. Nga informacionet e fundit, aksi rrugor Qafë Thore–Bogë është zhbllokuar dhe qarkullimi po zhvillohet normalisht. Ndërkohë, aksin Selcë–Qafë Berdelëci po e pengojnë ngricat e shumta, duke detyruar disa automjete të kthehen në fshatin Tamare.
Në terren ndodhen shërbimet e Policisë Rrugore dhe mjetet borëpastruese, në koordinim të vazhdueshëm për menaxhimin e situatës dhe garantimin e sigurisë rrugore.
Autoritetet bëjnë thirrje për qytetarët që të shmangin lëvizjet e panevojshme në akset problematike, të respektojnë rregullat e qarkullimit dhe të ndjekin udhëzimet e Policisë. Në rast nevoje, qytetarët ftohen të kontaktojnë menjëherë me Policinë e Shtetit ose shërbimet e emergjencave.
