Jan Urban, trajneri i kombëtares polake të futbollit e di fare mirë se sfida kundër Shqipërisë për fazën play-off të Kupës së Botës 2026 nuk do jetë e lehtë, paçka se të tijtë i presin kuqezinjtë në Varshavë.
Në një bisedë të fundit për TVP Sport, 63-vjeçari tha se Shqipëria ka një ekip të disiplinuar, me cilësi teknike dhe që pëson pak gola.
“Ne e njohim më mirë Shqipërinë, pasi jemi përballur me ta në kualifikueset e Euro 2024 dhe kualifikueset e Kupës së Botës 2022. Ata janë kundërshtari ynë më i rëndësishëm, pasi po luajmë ndeshjen tonë të parë në këtë fazë kundër tyre. Ata kanë një ekip të përbërë nga lojtarë të stërvitur teknikisht mirë që pësojnë pak gola, megjithëse shënojnë edhe pak.
Janë të organizuar, të disiplinuar dhe luajnë në Itali dhe për klube aziatike. Janë lojtarë të fortë, nuk është rastësi që patëm probleme me ta më pak se dy vjet më parë, kur na mposhtën 2-0 në Tiranë”, shpjegoi trajneri polak.
Urban tha se mes rivalëve, Suedia është ekipi më i dobët, për shkak se nuk fitoi asnjë takim në kualifikuese.
“Sa i përket Suedisë dhe Ukrainës, është ende e paqartë se me kë do të ishte më mirë të përballeshim në finale. Nëse i shohim vetëm kualifikueset, përgjigjja është e thjeshtë, Suedia është më e dobët, pasi nuk ka arritur të fitojë asnjë nga gjashtë ndeshjet e tyre. Por ata ende kanë lojtarë të shkëlqyer që luajnë për klube të forta evropiane”, tha trajneri i Polonisë.
Trajneri polak ‘u zbut’ më pas, teksa tha se të gjitha skuadrat janë në një nivel, ndaj detajet dhe cilësitë do jenë ato që do vendosin kalimin në fazën finale të Botërorit.
“Ukraina është në një nivel të ngjashëm me ne, Suedinë dhe Shqipërinë. Detajet, aftësitë dhe cilësitë individuale do të përcaktojnë kualifikimin. Sot, mund të themi se lojtarët tanë po luajnë mirë në klubet e tyre, por play-off-et janë ende dy muaj larg. Pra, le të mos jetojmë në të tashmen, sepse situata mund të ndryshojë në çdo moment dhe po ndryshon. Është dinamike. Nuk mund ta lëmë veten të na zërë në befasi asnjë rrethanë”, tha Urban mes të tjerash.
Më 26 mars Shqipëria luan kundër Polonisë në Varshavë dhe nëse kalon këtë rival në ndeshjen teke, do përballet me fituesin e çiftit Ukrainë – Suedi për një biletë në fazën finale të Kupës së Botës 2026, e cila zhvillohet në SHBA, Kanada dhe Meksikë nga 11 qershori deri më 19 korrikun e këtij viti.
