*TA NEA*
*Vizita e parë zyrtare e ministrit të Bujqësisë së Shqipërisë në Greqi. Kë takon sot në Athinë Andis Salla*
_Takimi me Konstantinos Tsiaras dhe objektivat e ministrit shqiptar._
Vizitën e tij të parë zyrtare në kryeqytetin grek po zhvillon që nga dje ministri i Bujqësisë dhe Zhvillimit Rural, Andis Salla, me synim kryesor, siç shpjegon në artikullin e tij të sotëm që publikon gazeta Ta Nea, forcimin e bashkëpunimit bujqësor midis Greqisë dhe Shqipërisë.
Bëhet fjalë për vizitën e parë të një ministri me këtë portofol nga Tirana në Athinë, në një moment kur bujqësia shqiptare po vendos bazat e nevojshme për të hyrë në tregun e përbashkët evropian dhe në të njëjtën kohë kur pala greke po përpunon ende mësimet e saj nga kriza e fundit me sektorin bujqësor në qendër.
Siç thekson vetë ministri 38-vjeçar i Bujqësisë dhe Zhvillimit Rural i Shqipërisë në “NEA”, objektivat kryesore lidhur me vizitën e tij tre-ditore (12-14/2) në Athinë janë: së pari, rritja e volumit të shkëmbimeve tregtare dypalëshe; së dyti, thellimi i bashkëpunimit institucional për përafrimin me politikat dhe rregulloret e BE-së; dhe së treti, marrja e ekspertizës përmes shfrytëzimit të praktikave të provuara të Greqisë gjatë zbatimit të Politikës së Përbashkët Bujqësore.
Dita e parë e misionit tre-ditor të Andis Sallës në Athinë përfshiu vizita në biznese shqiptare, takime me anëtarë të diasporës shqiptare, kontakte me përfaqësues të komunitetit shqiptar të biznesit në Greqi dhe një takim kokë më kokë me Rektorin e Universitetit Bujqësor të Athinës.
Agjenda e sotme e kontakteve fillon në orën 11:00 me një takim dypalësh në Ministrinë greke të Zhvillimit Rural dhe Ushqimit me homologun e tij grek, Konstantinos Tsiaras, dhe vazhdon në orën 12:30 me një ndalesë në parlament për bisedime me kryetaren e Komisionit të Përhershëm të Prodhimit dhe Tregtisë, Fotini Arabatzi. Menjëherë pas kësaj, ministri shqiptar i Bujqësisë dhe Zhvillimit Rural do të pritet në Ministrinë e Jashtme greke nga zëvendësministri i Jashtëm Haris Theoharis, përgjegjës për çështjet e Diplomacisë Ekonomike dhe Hapjes dhe më vonë do të vizitojë Dhomën Tregtare tē Profesionistëve të Athinës për një takim, ndër të tjera, me presidentin e institucionit, Jannis Hatzitheodosiou.
Në sfondin e kontakteve të tij në kryeqytetin grek dhe objektivave që dëshiron të arrijë, kryesisht përmes thellimit të bashkëpunimit dypalësh në çështjet e portofolit të tij, Andis Salla foli për “ TA NEA” si për marrëdhëniet greko-shqiptare ashtu edhe për sfidat e përbashkëta që përballen dy vendet në kuadër të krizës klimatike.
“Marrëdhëniet shqiptaro-greke duhet të vazhdojnë të zhvillohen me frymë pozitive, të bazuara në interesat tona të përbashkëta strategjike, bashkëpunimin tonë të ngushtë në kuadër të NATO dhe perspektivën tonë evropiane”, theksoi ministri shqiptar.
“Sa u përket sfidave të përbashkëta, ndryshimi klimatik i bën ato më të shpeshta dhe më të kushtueshme: thatësira dhe valë të të nxehtit, presion mbi burimet ujore dhe sistemet e ujitjes, zjarre, erozion dhe fenomene ekstreme të motit, si dhe përhapja në rritje e sëmundjeve dhe parazitëve të bimëve dhe kafshëve. Afërsia gjeografike dhe ngjashmëritë klimatike midis disa rajoneve greke dhe shqiptare na japin një avantazh: zhvillimin e zgjidhjeve të përbashkëta dhe në kohë për menaxhimin e ujërave, bujqësinë inteligjente ndaj klimës, sistemet e paralajmërimit të hershëm, biosigurinë dhe përshtatjen e prodhimit. Qëllimi është i qartë: mbrojtja e të ardhurave të fermerëve dhe forcimi i qëndrueshmërisë së prodhimit bujqësor në të dy vendet”, thekson ai.
Me përcaktim të qartë se ku synon Tirana në lidhje me planifikimin e politikës së saj bujqësore me horizont anëtarësimin në BE, Andis Salla përfundon nesër misionin e tij të parë në Athinë me një drekë pune që do të ketë me përfaqësues të sektorit bujqësor dhe agro-biznesit grek.
Megjithatë, bashkëpunimi i tij me palën greke do të vazhdojë, pasi, siç thekson në artikullin e tij të sotëm në “ TA NEA” nga Athina pret mbështetje vendimtare për përfundimin e negociatave me BE-në brenda afateve të paracaktuara, me fokus tre kapitujt e portofolit të tij.
