Kuvendi i Shqipërisë rrëzoi këtë të enjte kërkesën e Prokurorisë së Posaçme kundër Krimit të Organizuar dhe Korrupsionit , SPAK, për heqjen e imunitetit të deputetes socialiste Belinda Balluku. Pas debatit në seancën plenare, ku u prezantuan raportet e shumicës dhe opozitës nga Ulsi Manja dhe Oerd Bylykbashi, votimi përfundoi me 82 deputetë kundër dhe 47 pro, duke bllokuar kështu autorizimin për arrestim.
Gjatë diskutimeve, socialistët argumentuan se Balluku nuk mban më poste ekzekutive dhe nuk përbën rrezik për arratisje apo prishjen e provave, ndërsa opozita theksoi mundësinë e ndikimit tek dëshmitarët ose ndërhyrjes në hetim
Paralelisht, Partia Demokratike organizoi një protestë para Kuvendit, e cila u mbyll pa incidente pas fjalës së kreut të saj, Sali Berisha.
Ai njoftoi një protestë kombëtare më 22 mars, duke cilësuar votimin kundër heqjes së imunitetit si një “autorizim për kryengritje paqësore kundër qeverisë”.Nga ana tjetër, kryesia e Partisë Socialiste siguroi pjesëmarrjen e deputetëve të shumicës, megjithëse katër prej tyre, përfshirë edhe vetë Ballukun, munguan në votim. Në votim iu bashkuan edhe tre deputetë të PSD-së, duke siguruar shumicën e nevojshme për refuzimin e kërkesës së SPAK.
Siguria për protestën dhe seancën u menaxhua nga rreth 1,500 efektivë policie, me kontrolle të shtuara dhe kufizime në qarkullimin e automjeteve përreth godinës së Kuvendit dhe ish-selisë së PD-së. Kryeministri Edi Rama ishte prezent në seancë, duke ndjekur nga afër zhvillimet e ditës.
Ngjarjet e sotme theksojnë përplasjen e fortë politike mes mazhorancës dhe opozitës në Shqipëri, ku çështjet e imunitetit parlamentar dhe llogaridhënies për akuzat e SPAK mbeten pika të nxehta, ndërsa protesta opozitare paralajmëron për vazhdimësi të tensionit politik.
Ambasada Gjermane në Tiranë theksoi se mbështet integrimin e Shqipërisë në Bashkimin Evropian, duke nënvizuar se ndjekja penale e korrupsionit, përfshirë rastet e zyrtarëve të lartë, është një kusht i domosdoshëm. Në deklaratë theksohet se pritshmëria është që drejtësia të funksionojë me efektivitet dhe pa pengesa, dhe politika shqiptare duhet të garantojë këtë proces.
Po ashtu, Ambasada Britanike kërkoi ruajtjen e pavarësisë së gjyqësorit dhe nënvizoi se imuniteti parlamentar duhet të mbrojë proceset demokratike, por nuk duhet të pengojë llogaridhënien para ligjit. Ambasada vlerësoi progresin e Shqipërisë në reformën e drejtësisë që nga 2016, duke përfshirë krijimin e SPAK-ut, dhe theksoi rëndësinë e bashkëpunimit të ekzekutivit, gjyqësorit dhe legjislativit në këtë proces.
