Agjencia iraniane Fars News Agency, e lidhur me Islamic Revolutionary Guard Corps, raportoi se gjatë 24 orëve të fundit 15 anije kanë kaluar nëpër Ngushticën e Hormuzit “me leje nga Irani”. Megjithatë, trafiku detar mbetet rreth 90% më i ulët krahasuar me periudhën para nisjes së luftës.
Zyrtarë të lartë iranianë, përfshirë ministrin e Jashtëm Abbas Araghchi, kanë deklaruar vazhdimisht se ky korridor jetik detar nuk është plotësisht i mbyllur, por i kufizuar vetëm për ato që i cilësojnë si “vende armike”.
Sipas autoriteteve, disa vende, si Iraku, janë përjashtuar nga kufizimet e vendosura. Kjo u konfirmua edhe nga zëdhënësi i Iranit për Khatam al-Anbiya Central Headquarters.
Ndërkohë, në Iran po diskutohet edhe mundësia e vendosjes së tarifave për anijet që kalojnë nëpër ngushticë. Një zyrtar nga zyra e presidentit ka deklaruar më herët se Ngushtica e Hormuzit “do të rihapet plotësisht” vetëm pasi një pjesë e tarifave të tranzitit të përdoret për të kompensuar dëmet e shkaktuara nga lufta.
