Prokuroria e Posaçme (SPAK) ka dhënë pretencën lidhur me një nga dosjet që ka të bëjë me shkelje të barazisë në tendera dhe ankande publike, të kryera në bashkëpunim në disa procedura prokurimi.
Çështja po gjykohet me procedurë të shkurtuar.
SPAK kërkon dënimin me 10 vite burg për ish-drejtorin e ARRSH-së, Evis Berberi, i akuzuar për shkelje të barazisë në tendera në 5 episode, korrupsion pasiv në 6 episode dhe pastrim parash në 1 episod. Për shkak të gjykimit të shkurtuar, dënimi ulet me 1/3, duke zbritur në 6.8 vite burg.
Për ish-drejtorin tjetër të ARRSH-së, Gentian Gjyli, SPAK kërkon 1.6 vite burg për shkelje të barazisë në tendera në 2 episode, si dhe ndalim për ushtrimin e funksioneve publike për 5 vite.
Po ashtu, për ish-drejtorin e KESH-it, Erald Elezi, prokuroria kërkon 1.6 vite burg, për shkelje të barazisë në tendera, që gjithashtu ulet me 1/3 për shkak të gjykimit të shkurtuar, si dhe ndalim 5-vjeçar nga funksionet publike.
Prokurori i SPAK, Dritan Prençi, lexoi gjithashtu konkluzionet përfundimtare edhe për 20 të pandehur të tjerë në këtë dosje.
SPAK ka kërkuar gjithashtu konfiskimin e parave të sekuestruara në banesën e Evis Berberit.
