“NATO deklaron se është e përgatitur të përballet me çdo kërcënim dhe të marrë të gjitha masat e nevojshme për mbrojtjen e aleatëve të saj, pas raportimeve se Irani ka shqyrtuar mundësinë e sulmeve ndaj objektivave ushtarake amerikane në Evropë në rast të përshkallëzimit të konfliktit nga administrata e Donald Trump.
Reagimi i aleancës erdhi pas një raportimi të Financial Times, sipas të cilit Teherani ka vlerësuar skenarë për goditje ndaj instalimeve ushtarake amerikane në territorin evropian, përfshirë Evropën Juglindore.
I pyetur nga mediat e huaja për këto raportime, një zyrtar i NATO-s tha se aleanca disponon kapacitete të fuqishme mbrojtëse dhe parandaluese.
NATO është e përgatitur të përballet me çdo kërcënim dhe gjithmonë do të bëjë atë që është e nevojshme për të mbrojtur të gjithë aleatët”, deklaroi zyrtari.
Zyrtari i aleancës iu referua edhe operacioneve të mbrojtjes ajrore në fillim të vitit 2026, duke thënë se raketat balistike të lëshuara nga Irani drejt Turqisë u interceptuan në katër raste të veçanta.
Sipas tij, këto raste tregojnë se kapacitetet parandaluese dhe mbrojtëse të NATO-s janë funksionale dhe efektive përballë kërcënimeve të tilla.
Çfarë raportoi Financial Times?
Sipas burimeve të cituara nga “Financial Times”, autoritetet iraniane kanë diskutuar mundësinë e zgjerimit të konfliktit përtej Lindjes së Mesme nëse SHBA-ja ndërmerr hapa të rinj ushtarakë.
