Në kohën e stanjacionit të Leonid Brezhnevit thuhej se Komiteti Qendror mblidhej për të rikonfirmuar të dukshmen. Dalja e dytë brenda një muaji e Vladimir Putinit, në rolin e “babait të kombit”, në asamblenë e partisë së tij Rusia e Bashkuar, ka disa ngjashmëri me atë të kaluar, sepse mesazhi është se gjithçka është në rregull, terreni është pastruar nga çdo pengesë dhe në zgjedhjet parlamentare të 18-20 shtatorit nuk do të ketë surpriza.
Kështu, sipas një skenari tashmë të konsoliduar, partia që presidenti rus e konsideron si krijesën e tij politike, “isha unë ai që një ditë e krijova”, tha dje, pritet të sigurojë një fitore të thellë, pavarësisht se mbështetja aktuale për të është vetëm 33%, sipas sondazheve të fundit. Duke parë alternativat e pakta politike në Rusi dhe eliminimin e të vetmit konkurrent, partisë pacifiste Jabloko, ky është një rezultat që gjithsesi duhet t’i shtyjë strategët e Kremlinit të reflektojnë.
Drejt zgjedhjeve
Por nuk ka hapësirë për improvizime, ndryshim qëndrimi apo për të pranuar lodhjen gjithnjë e më të përhapur nga lufta. Përpara me shfaqjen elektorale, me një proces të përgatitur mirë. Pjesën e tyre pritet ta marrin edhe aleatët: komunistët, liberal-demokratët, si dhe “Njerëz të Rinj”, partia që përfaqëson shtresën e mesme dhe sipërmarrësit. Secila pritet të marrë rreth 10%, pak më shumë ose pak më pak. Më pas vjen “Rusia e Drejtë”, e cila i referohet Dostojevskit për ta përkufizuar veten si zëri i “të poshtëruarve dhe të fyerve”.
Të gjitha janë parti satelite të pushtetit, të cilat kanë të përbashkët mbështetjen e deklaruar për luftën dhe nacionalizmin që buron prej saj. Në fakt, Putin dje falënderoi ata që, të paktën në teori, duhet të ishin rivalët e tij politikë, “për qëndrimin e tyre shtetëror dhe patriotik, për mbështetjen që i japin popullit, atdheut dhe mua si kreu i shtetit në zgjidhjen e detyrave shumë të rëndësishme me të cilat përballet vendi”.
Në pallatin Megasport, i ndërtuar në territorin e ish-aeroportit, zonë ku në vitin 1896, gjatë rrëmujës që pasoi festimet për kurorëzimin e Nikollës II, humbën jetën më shumë se 1.300 persona, Putin përdori gjerësisht retorikën patriotike.
Ai foli për unitetin e kombit dhe vlerat e trashëguara nga paraardhësit. Jo rastësisht, për kongresin ishte zgjedhur Dita e Flamurit Kombëtar. Putin foli gjithashtu për respektimin e parimeve demokratike që, sipas tij, janë pjesë e procesit zgjedhor, duke iu referuar në mënyrë të pashmangshme faktit se në Ukrainë nuk zhvillohen më zgjedhje dhe duke deklaruar se “regjimit të Kievit i mungon legjitimiteti”.
Presidenti rus foli edhe për kapërcimin e sigurt të vështirësive ekonomike dhe për atë që e cilësoi si “thelbi neonazist dhe rusofob” i sulmeve të fundit ukrainase ndaj qendrave të tregtisë online në zona të ndryshme të Rusisë. Me pak fjalë, ai paraqiti vizionin e tij për botën dhe realitetin në të cilin jeton.
Hakmarrja
Duke pasur parasysh kontekstin e një tjetër aktiviteti ku Putin u shfaq si figura e padiskutueshme e pushtetit, tonet e tij ishin të drejtpërdrejta. Në thelb, Putin përsëriti parimin “sy për sy”, duke e lidhur shtimin e fundit të bombardimeve ruse me sulmet ukrainase kundër infrastrukturës ekonomike dhe logjistike brenda Rusisë. Ai pranoi se këto sulme po “shkaktojnë dëme ekonomike dhe sjellin humbje”, por sipas tij nuk po arrijnë të sjellin ndonjë kthesë në luftën që po zhvillohet.
“Regjimi i Kievit e hapi vetë këtë kuti të Pandorës, por masat hakmarrëse nuk do të vonojnë dhe do të jenë shumë më të fuqishme dhe shumë më shkatërruese”, deklaroi Putin.
Edhe më domethënëse, pasi e bën të qartë një strategji që tashmë është e dukshme, ishte deklarata tjetër e presidentit rus për këtë çështje, dhënë për gazetarin e televizionit shtetëror Pavel Zarubin.
Putin tha se sulmet kundër infrastrukturës ukrainase janë “në kohën e duhur dhe efektive” dhe se ato kontribuojnë “për të ndihmuar djemtë tanë në front që të arrijnë objektivat e tyre ushtarake”.
Në skenë edhe Lavrov
Në skenë doli edhe ish-presidenti rus Dmitry Medvedev, i cili foli për “lehjet për shkatërrimin e Rusisë që vijnë nga lukuni perëndimore”. Ministri i Jashtëm rus, Sergey Lavrov, nga ana tjetër, e cilësoi Europën si “një të sëmurë të mbushur me metastaza të nazizmit”, ndërsa premtoi se Rusia nuk do të ulet kurrë në tryezën e bisedimeve me “asnjë shtet europian aleat të nazistëve të Kievit”.
Këtyre deklaratave, që lënë pak hapësirë për mundësinë e një negociate të ndërmjetësuar nga një vend europian, iu shtua më pas edhe qëndrimi i vetë Putinit.
“Propozimet për marrëveshje që na paraqiten janë shpesh fëminore dhe të papranueshme. Ne jemi të gatshëm të negociojmë me Ukrainën, por duke u bazuar në realitetin aktual në terren”, deklaroi presidenti rus.
Vladimir Putin ndihet në avantazh dhe tregon se nuk ka aspak ngut. Mesazhi është i qartë: i gjithë Donbasi, ose luftë pa fund.
Në përfundim të fjalimit të tij, duartrokitjet e zakonshme u shoqëruan edhe nga thirrjet për një “Rusi që nuk njeh kufij”. /Corriere Della Sera/
