Seanca e sotme plenare është përfshirë nga debate të forta politike dhe përplasje mes mazhorancës dhe opozitës, teksa në Kuvend po diskutohet projektligji i Partisë Socialiste për reformën administrativo-territoriale, që parashikon shkrirjen e 15 bashkive.
Mazhoranca është e vendosur ta miratojë draftin, ndërsa opozita kërkon tërheqjen e tij dhe zhvillimin e një referendumi, duke kundërshtuar mënyrën se si është hartuar dhe konsultuar reforma.
Kreu i grupit parlamentar të PD-së, Gazment Bardhi, akuzoi socialistët se nuk kanë marrë mendimin e qytetarëve që preken nga ndryshimet territoriale. Sipas tij, 15 këshilla bashkiakë kanë shprehur kundërshtimin ndaj bashkimit dhe këto qëndrime nuk janë marrë në konsideratë.
“Si futet në procedurë një iniciativë që shkel ligjin? Nuk ka mendime të qytetarëve që preken nga reforma”, deklaroi Bardhi, duke vënë në pikëpyetje edhe kriteret mbi të cilat është vendosur se cilat bashki do të shkrihen dhe cilat do të mbeten.
Nga ana tjetër, mazhoranca mbron procesin e ndjekur dhe argumenton se reforma është konsultuar në territor. Ministri Arbjan Mazniku deklaroi se janë zhvilluar 121 dëgjesa publike dhe se projektligji u është dërguar për mendim 61 këshillave bashkiakë.
Mazniku tha se shkrirja e bashkive nuk do të shoqërohet me largimin e shërbimeve për qytetarët, ndërsa premtoi ruajtjen e identitetit të qyteteve dhe përfaqësimin proporcional të komuniteteve në këshillat bashkiakë.
“Bashkimi i bashkive nuk do të largojë asnjë shërbim”, tha Mazniku, duke argumentuar se reforma synon forcimin e pushtetit vendor dhe rritjen e kapaciteteve për investime.
Në të njëjtën linjë, Taulant Balla deklaroi se socialistët e kanë marrë mbështetjen për reformën që në zgjedhjet e 11 majit, pasi ajo ishte pjesë e programit elektoral të PS-së. Ai tha se drafti do të votohet sot dhe ftoi opozitën që të bashkohet në fazën e diskutimit për kompetencat dhe financat e bashkive.
Balla e lidhi gjithashtu reformën territoriale me procesin e integrimit europian, duke argumentuar se një pjesë e konsiderueshme e legjislacionit të BE-së zbatohet në nivel vendor.
Përplasjet nuk kanë munguar as brenda sallës së Kuvendit. Sali Berisha e ka cilësuar reformën si një akt që dëmton komunitetet dhe ka akuzuar mazhorancën se po shpërfill zërin e qytetarëve. Ai kërkoi që çështja të kalojë në referendum.
Në një tjetër përplasje, Berisha u përball me deputetët socialistë Blendi Klosi dhe Agron Malaj, me akuza të ndërsjella për interesat që fshihen pas hartës së re territoriale. Debatet u shoqëruan me tone të ashpra dhe akuza personale.
Edhe Luçiano Boçi e kundërshtoi fort projektin, duke e lidhur reformën me rrezikun e shpopullimit dhe duke akuzuar mazhorancën se nuk ka marrë parasysh nevojat reale të komuniteteve.
Ndërkohë, deputeti demokrat Enno Bozdo tha se nuk mund të vendoset fillimisht për hartën dhe vetëm më pas të diskutohet për financat, decentralizimin dhe kompetencat e pushtetit vendor.
Përplasjet politike u shfaqën edhe në nisje të seancës, kur Gazment Bardhi pati një debat me kryeparlamentarin Niko Peleshi lidhur me praninë e Gardës në sallë. Paralelisht, jashtë Kuvendit vijoi protesta kundër reformës.
Një tjetër moment i debatueshëm ishte qëndrimi i deputetëve socialistë që kishin shprehur rezerva ndaj draftit. Në mbledhjen e grupit parlamentar të PS-së, Edi Rama ishte i pranishëm, ndërsa Vullnet Sinaj ndryshoi qëndrim dhe votoi pro reformës. Erion Braçe vijoi të mbajë qëndrim kundër.
Në mbledhjen e grupit, Rama mësohet se i ka bërë të qartë Braçes se mosrespektimi i vendimit politik të grupit mund të sillte përjashtimin e tij nga PS.
Pikërisht votat janë një nga elementët kyç të seancës së sotme, pasi për miratimin e reformës nevojiten 84 vota. Mazhoranca synon ta sigurojë këtë shumicë dhe të çojë përpara hartën e re, ndërsa opozita kërkon ndalimin e votimit dhe rikthimin e çështjes për konsultim me qytetarët.
Në thelb të përplasjes qëndrojnë dy qëndrime diametralisht të kundërta: PS argumenton se bashkitë më të mëdha do të kenë më shumë kapacitete dhe mundësi për investime, ndërsa opozita paralajmëron se shkrirja e 15 bashkive rrezikon autonominë vendore, shërbimet dhe përfaqësimin e komuniteteve.
