Policia e Shtetit ka dhënë versionin e saj për incidentin e regjistruar pranë selisë së Partisë Demokratike, ku një grup personash të maskuar është futur në ambientet e jashtme të godinës gjatë përplasjeve me uniformat blu.
Sipas policisë, personat në fjalë kanë hedhur molotovë në drejtim të efektivëve dhe janë futur në ambientet e jashtme të selisë së PD-së për t’i shpëtuar ndjekjes policore. Autoritetet pretendojnë se sulmi ndaj punonjësve të policisë ka vijuar edhe pasi grupi është futur në këto ambiente.
Përballë kësaj situate, shërbimet e policisë janë kundërpërgjigjur me gaz lotsjellës, sipas deklaratës zyrtare.
Në reagimin e saj, Policia e Shtetit ka kundërshtuar pretendimet e tjera për ngjarjen, duke i cilësuar ato si të pavërteta dhe të qëllimshme, me synimin, sipas saj, për të fshehur të vërtetën.
Reagimi vjen pas incidentit në selinë e PD-së, ku zhvillimet e mbrëmjes u shoqëruan me tensione mes protestuesve dhe forcave të rendit.
