Mirëserdhe në selinë e NATO-s! Është bukur të shoh përsëri. Të gjithë jemi të tronditur nga tërmeti që goditi Shqipërinë në nëntorin e kaluar, dhe në NATO, të gjithë e ndiejmë dhimbjen e atyre që janë lënduar, theksoi Sekretari i Përgjithshëm i NATO-s, Jens Stoltenberg. “Edi pësoi edhe një humbje personale. Ju lutemi pranoni ngushëllimet e mia të thella për të gjithë ata që humbën të dashurit e tyre në atë tërmet të tmerrshëm. NATO iu përgjigj nevojave përmes qendrës sonë të koordinimit të fatkeqësive. Ne kemi mobilizuar ndihmën e aleatëve dhe partnerëve. Kjo tregon se kur një aleat vuan, ne jemi të gjithë bashkë. Dhe ne veprojmë së bashku”, shtoi ai.
Më tej Stoltenberg theksoi se “Shqipëria është një aleat i çmuar, dhe pjesëmarrja e Shqipërisë në operacionet, misionet e NATO-s në Kosovë, Afganistan dhe shtetet e Balltikut është një kontribut i fortë për sigurinë tonë të përbashkët”.
“Ne mund të mbështetemi te angazhimi aktiv dhe pozitiv i Shqipërisë për stabilitetin dhe bashkëpunimin në rajonin e Ballkanit Perëndimor. Dhe roli juaj aktiv në promovimin e politikës së ‘derës së hapur’ të NATO-s. Jam inkurajuar nga përpjekjet e Shqipërisë për të investuar më shumë në mbrojtje. Dhe unë ju mbështes në këtë përpjekje. Investimet e NATO-s në bazën ajrore të Kuçovë tregojnë angazhimin tonë për Shqipërinë dhe rajonin. Dhe kjo do të na bëjë të gjithë më të sigurt, sepse do të forcojë praninë tonë në këtë pjesë të Europës”, theksoi ai.
“Kështu që kryeministri Rama, faleminderit përsëri për kontributin e fortë të Shqipërisë në sigurinë dhe stabilitetin tonë të përbashkët, përmes NATO-s dhe tani përmes presidencës së OSBE-së”, falenderi Stoltenberg. “Edhe një herë, mirëserdhe, është kënaqësi t’ju shoh përsëri”, përfundoi deklaratën kreu i NATO-s.
