Duke përkujtuar 45-vjetorin e Aktit Final të Helsinkit, Kryetari i radhës së OSBE-së, kryeministri Edi Rama, bën thirrje për rigjallërimin e parimeve dhe angazhimeve të këtij akti, në mes të kohërave të vështira që po kalon bota.
”Forcimi i mëtejshëm i OSBE-së dhe qasja e saj gjithëpërfshirëse ndaj sigurisë është e lidhur pazgjidhshmërisht me respektimin e plotë dhe zbatimin e parimeve themelore dhe angazhimeve të përcaktuara në Aktin Final të Helsinkit”, deklaroi Kryetari i OSBE-së, Kryeministri dhe Ministri për Europën dhe Punët e Jashtme të Shqipërisë, Edi Rama.
Rama përkujtoi me respekt Aktin Final të Helsinkit duke theksuar se ”ai ishte instrumenti në përparimin e sigurisë njerëzore për më shumë se katër dekada në zonën e OSBE-së”.
”Procesi i Helsinkit dha një kontribut të rëndësishëm për uljen e tensioneve dhe krijimin e kushteve që çuan në fund të Luftës së Ftohtë”, tha ai.
”Ai lehtësoi kalimin nga konfrontimi në bashkëpunim dhe hapi rrugën për krijimin e Organizatës së Sigurisë dhe Bashkëpunimit në Evropë, e parashikuar në Kartën e Parisit dhe e themeluar në 1995”, shtoi Rama.
Rama theksoi se mënyra e duhur për të përkujtuar Aktin Final të Helsinkit është bërja e përpjekjeve urgjente drejt realizimit të vizionit të saj për marrëdhëniet ndërshtetërore dhe respektimin e angazhimeve.
“Ndërsa Europa është e mërzitur nga konfliktet, puna e Organizatës sonë, si dhe vullneti i mirë i të gjitha shteteve pjesëmarrëse të saj, është e nevojshme edhe më shumë. Për të qenë kuptimplotë dhe relevantë, paqja dhe demokracia nuk duhet të jenë thjesht fjalët dhe horizonti ynë i zakonshëm, por objektivat tona të përbashkëta. Dekalogu i Helsinkit me 10 parimet e tij, përfshirë respektimin për liritë themelore dhe të drejtat e njeriut janë po aq të rëndësishme sot sa ato ishin edhe atëherë, 45 vjet më parë”, deklaroi Rama.
“Kjo marrëveshje historike u arrit nga një grup i larmishëm vendesh që nuk kishin një qasje të përbashkët për të gjitha çështjet”, tha Rama.
Ai shtoi se pavarësisht ndarjeve të ashpra në atë kohë, vendet zhvilluan një vizion dhe patën guximin të vendosnin themelet e sistemit gjithëpërfshirës të sigurisë, që i ka shërbyer OSBE-së për gati gjysmë shekulli.
“Ne duhet të gjejmë frymëzim në këtë përvjetor për të ecur përpara me vendosmëri të përtërirë”, tha Kryetari i Përgjithshëm i OSBE-së.
Ai vuri në dukje se besimi mund të ndërtohet vetëm përmes dialogut të hapur dhe të sinqertë dhe se kjo kërkon përpjekje të vazhdueshme, durim dhe këmbëngulje.
“Jam i bindur se platforma gjithëpërfshirëse e OSBE-së për dialog dhe veprim të përbashkët e bën atë një forum të rëndësishëm dhe të qëndrueshëm”, përfundoi Rama.
