37% e pacientëve me Covid-19 kanë të paktën një simptomë tre deri në gjashtë muaj pas infektimit, sipas një studimi të ri britanik, i cili konfirmon faktin se “Covid i zgjatur” nuk është diçka e pazakontë.
Studiuesit në Universitetin e Oksfordit dhe Institutit Britanik për Kërkime Shëndetësore (NIHR), studiuan të dhënat e më shumë se 273,000 personave të infektuar me koronavirus. Simptomat më të zakonshme ishin problemet e frymëmarrjes, lodhja, dhimbja e muskujve, ankthi apo edhe depresioni.
Simptomat janë më të zakonshme tek personat e shtruar në spital dhe te gratë. Gjithashtu të moshuarit kanë më shumë gjasa të kenë vështirësi në frymëmarrje ndërsa të rinjtë vuajnë më shumë nga dhimbjet e kokës, dhimbjet e barkut dhe problemet psikologjike.
Ata që nuk kishin nevojë të shtroheshin në spital kanë më shumë gjasa të vuajnë nga dhimbja e kokës më vonë. Sipas një studimi tjetër britanik, të paktën një në dhjetë nxënës të shkollave të mesme kishin simptoma të “Covid të zgjatur”.
Në total, rreth 970,000 persona në Mbretërinë e Bashkuar vuajnë nga “Covid i zgjatur”, nga të cilët 384,000 vazhdojnë të kenë të paktën një simptomë një vit pas infektimit.
