Bashkimi Evropian do të shqyrtojë programin e trajnimit ushtarak për ushtarët ukrainas, njoftoi sot përfaqësuesi i Lartë i Bashkimit Evropian për Punët e Jashtme dhe Politikën e Sigurisë, Josep Borrell.
“Është e arsyeshme që mbështetja e BE-së për Ukrainën të përfshijë përpjekjet jo vetëm në drejtim të furnizimeve materiale, por edhe në drejtim të trajnimit, si dhe ndihmën në organizimin e forcave të armatosura”, tha Josep Borrell në një seminar universitar në Santander, në Spanjë.
Gjashtë muaj më parë, në fazat e hershme të pushtimit rus, ministrat e Jashtëm të BE-së ngritën idenë e ofrimit të trajnimit për forcat ukrainase mes diskutimeve më të gjera për ndihmën ushtarake.
Borrell tha se ministrat e Mbrojtjes të BE-së do të diskutonin programin gjatë një takimi jozyrtar javën e ardhshme në Pragë, por nuk dha detaje të mëtejshme.
BE-ja i ka ofruar Ukrainës 2.5 miliardë euro (2.5 miliardë dollarë) ndihmë ushtarake për pajisje, karburant, furnizime mjekësore dhe armë që kur rusët pushtuan vendin në muajin shkurt.
Financimi vjen nga një fond i quajtur Fondi Evropian i Paqes (EPF), një mekanizëm i veçantë i buxhetit të BE-së.
EPF rimburson vendet e BE-së që dërgojnë ndihmë ushtarake dhe lejon BE-në të përforcojë forcat e armatosura të vendeve partnere.
Shtetet anëtare të BE-së i kanë ofruar gjithashtu armë Ukrainës përmes përpjekjeve dypalëshe të pavarura nga blloku.
