BBC
Vendet e Bashkimit Evropian do të përballen me pesë deri në 10 dimra të tmerrshëm nëse nuk bëhet asgjë për të ulur çmimet e gazit, thotë ministri i Energjisë i Belgjikës, Tinne Van der Straeten. Shtetet e BE-së janë duke luftuar me rritje të mëdha të çmimeve të energjisë që kur furnizuesi kryesor i gazit Rusia pushtoi Ukrainën në shkurt.
Vendet që mbështesin Ukrainën po përpiqen të shkurtojnë importet e gazit dhe naftës ruse. Rusia, e cila furnizoi BE-në me 40% të gazit të saj vitin e kaluar, ka kufizuar furnizimet. Përveç gazit, çmimet e energjisë elektrike kanë arritur nivele rekord. Gazi natyror ende përdoret gjerësisht për të prodhuar energji elektrike. Për shkak se çmimet e gazit janë rritur, kjo kushton më shumë.
“Ne duhet të ndalojmë këtë çmenduri që po ndodh tani në tregjet e energjisë,” tha kancelari i Austrisë Karl Nehammer. “Ne nuk mund të lejojmë që Putin të përcaktojë çmimin e energjisë elektrike në Europë,” shtoi ai.
A mund të përballojë bota pa gazin dhe naftën ruse?
Gjermania, importuesi më i madh i gazit rus në vitin 2020, ka bërë përpjekje për të forcuar rezervat e saj të gazit para dimrit, pavarësisht se Rusia ka shkurtuar furnizimet. Synimi i saj është të arrijë të mbushë kapacitetet e gazit në 85% deri në tetor. Për ta bërë këtë, ajo ka zbatuar masa për kursimin e energjisë.
Ministri i Ekonomisë Robert Habeck tha se masa të tilla, së bashku me blerjen e gazit nga furnizuesit alternativë, i kishin mundësuar Gjermanisë të përmbushte qëllimin e saj më shpejt se sa ishte parashikuar. Ai vlerësoi se objektivi prej 85% mund të arrihet deri në fillim të shtatorit.
Kryeministri i Belgjikës Alexander de Croo javën e kaluar paralajmëroi se njerëzit duhet të “shpresojnë për më të mirën dhe të përgatiten për më të keqen”. Dhe kryeministrja franceze Elisabeth Borne u tha udhëheqësve të biznesit të hënën që të paraqisnin planet e kursimit të energjisë deri në muajin e ardhshëm, përndryshe mund të ketë racionim të energjisë.
