Mbi 2 mijë udhëtarë të apasionuar, me plot 980 automjete janë nisur nga Polonia drejt Shqipërisë. Mjetet po mbërrijnë tek Kamping Pa Emër, Guri i Lëmuar në Domen, Kavajë.
980 mjete lindore nga të cilat 20 motoçikleta, u nisën në 3 shtator nga Polonia, me destinacion Shqipërinë, me dy itinerare, si një karvan me mbi 2 mijë të apasionuar me udhëtimin dhe miqësinë mes kombeve, me qëllim mbledhjen e fondeve për fëmijët jetimë.
Złombol përkufizohet si një garë “bamirësie” qëllimi i të cilës është që udhëtarët të plotësojnë rreth 2500 km, duke përdorur makina që janë ndërtuar ose projektuar gjatë epokës komuniste. Ngjarja zhvillohet çdo vit në korrik, gusht ose shtator, dhe pika e nisjes është gjithmonë Katovica.
Kryeministri Edi Rama ndau sot pamje nga ky udhëtim duke theksuar se numri i turistëve polakë që kanë vizituar vendin tonë është rritur gjatë këtij viti.
“Mirëmëngjes dhe me karvanin e mbi 2 mijë udhëtarëve të apasionuar, me plot 980 automjete të nisura nga Polonia në vendin tonë, ju uroj një ditë të mbarë”, shkroi Rama në një postim në rrjetet sociale.
“126,795 turistë polakë vizituan vendin tonë gjatë periudhës Janar – Gusht 2022, 40,199 turistë më shumë se një 1 vit më parë”, theksoi Rama.
