Gjetja e një rezerve të madhe gazi e nafte, e një cilësie të lartë në Shpirag, zonën naftëmbajtëse më të rëndësishme në Shqipëri, vlerësohet si një nga arritjet më të mëdha nga studiuesit e hidrokarbureve.
Shpimi deri në mbi 6000 metra në thellësi të tokës sipas Stavri Dhimës, studiues dhe projektues i puseve të naftës, mund të sjellë në mbledhjen e deri në 100 milionë fuçive, një rezervë kjo përtej pritshmërive.
“Nëpërmjet matjeve të kryera u vërtetua se kemi një shtresë të konsiderueshme naftëmbajtëse, kemi një naftë të cilësisë së mirë, e cila është deri në 38 gradë, e lehtë e krahasueshme me atë të Arabisë Saudite.
Nga informacionet e publikuara zyrtare për pusin Shpiragu 2 është thënë se kati është më i madh sesa 800 metra, ndërsa për pusin “Shpiragu 5” ka kaluar 1 mijë metra dhe nuk ka kapur ujin, rezulton se kemi të bëjmë me një kat shumë të madh.
Nisur nga krahasimi me Val Dagrin mund të kemi deri në 100 milionë tonë rezerva të nxjerra”, tha eksperti Dhima për A2.
Përtej nxjerrjes, mundësia që kjo sasi nafte të përpunohet në vendin tonë sipas studiuesit Dhima është e pakët, duke u bazuar në nevojën e brendshme të tregut.
“Vendburimi Valt Dagri i cili prodhon deri në 85 mijë fuçi në ditë, ndërsa këtu pritet të ketë deri në 100 mijë fuçi nafte. Sasitë janë shumë të mëdha, do jetë shumë mirë të përpunohet e gjitha në vend edhe pse nevoja jonë nuk është kaq e madhe, por mundësia kryesore vërehet eksporti”, shtoi eksperti.
Sipas Dhimës, në Shqipëri janë 3 rafineri të cilat nuk prodhojnë në sasi të larta. Ndërtimi i një rafinerie e cila do të mund të përpunojë naftën në Shqipëri, u njoftua nga kryeministri Edi Rama në nëntor të 2022.
Sipas tij, Azerbajxhani do të investojë në ndërtimin e saj, e cila në fund do të sjellë përfitime duke ndikuar në uljen e çmimit të naf6tës dhe heqjes së importeve.
