5-vjetori i lidhjes, për Borën dhe Donaldin nuk ishte as një vend romantik i mbushur me petale trëndafili, as një udhëtim jashtë, hotel me 5 yje apo ndonjë surprizë tjetër e jashtëzakonshme që çifti të surprizonte njëri-tjetrin. Ky 5 nëntor, për moderatoren Bora Zemani dhe aktorin Donald Veshaj ishte as më shumë e as më pak, veçse në sheshin e xhirimit…
Festë me kamera e prozhektorë. Bora dhe Donaldi, edhe sot, në këtë të diel të shënuar për ta, kanë kaluar kohë në studion e xhirimit të filmit të tyre “5 herë jo”, i cili do të transmetohet në dhjetor të këtij viti.
“Unë me këtë vajzën, sot mbushim pesë vite bashkë dhe i thashë që do të të çoj në një vend të bukur, se e meriton. Dhe ja ku jemi. Festojmë”,- dëgjohet të thotë Donaldi në videon e ndarë në profilin e tij në Instagram.
Ndërsa Bora, pas pyetjes nëse i pëlqeu kjo surprizë, tha me humor: “U kënaqa shumë. Nuk imagjinoja dot diçka më të bukur se kaq. Ti gjithmonë më habit”.
Filmi “5 herë jo”, me protagonistë vetë Borën dhe Donaldin, ka në qendër historinë e tyre të dashurisë.
