Ish-diplomati amerikan Richard Grenell ka reaguar me një postim të fortë në Twitter, duke e quajtur një histori të rreme dhe të pavërtetë raportimin mbi kontratën e 6 milionë dollarëve për lobimin në SHBA për të hequr sanksionin “Non Grata” të vendosur për Sali Berishën. Në një postim të tij, Grenell theksoi se ky raport është një “gënjeshtër totale”, duke kërkuar që ai të korrigjohet menjëherë dhe të hiqet nëse ka vërtet interes për faktet.
Ky postim i Grenell erdhi pas reagimeve të shumta që u shfaqën në lidhje me publikimin nga Partia Demokratike të një kontrate lobimi, e cila përfshinte pagesën e 6 milionë dollarëve për lobimin me qëllim heqjen e sanksionit ndaj Berishës. Kjo kontratë ka shkaktuar debat dhe ka tërhequr vëmendjen e shumë personazheve të njohur, përfshirë edhe djalin e ish-presidentit amerikan, Donald Trump Jr., i cili ka bërë repost postimin e Grenell në Twitter, duke shprehur mbështetje për mesazhin e tij.
Në postimin e tij, Trump Jr. i referohet ngjarjes si një tentativë për të shpërndarë dezinformata dhe gënjeshtra, duke mbështetur pohimet e Grenell për këtë çështje. Ky reagim i dy figurave të njohura politike amerikane vjen në një kohë kur akuza për lobimin dhe financimin e kontratave të tilla është bërë një temë e nxehtë në politikën shqiptare.
Për shumë analistë dhe vëzhgues të situatës, ky reagim i Grenell dhe Trump Jr. duket të jetë një mesazh për të kundërshtuar dhe demaskuar çdo tentativë për të përdorur lobimin politik për të ndryshuar realitetin ligjor dhe politik në Shqipëri, sidomos në lidhje me çështjen e sanksionit ndaj Berishës.
Reagimi i Grenell:
‘I dashur Alfred Lela. E kuptoj që jeni disa ditë larg një zgjedhjeje të rëndësishme. E kuptoj që emocionet janë të larta. Zgjedhjet tuaja i kam parë në heshtje nga anash, sepse Shqipëria është një aleate e rëndësishme dhe e besuar e Amerikës në NATO (dhe një nga vendet e mia të preferuara për të vizituar dhe për të pushuar). Por kjo histori nga media juaj është një gënjeshtër TOTALE. Duhet të korrigjohet menjëherë dhe të hiqet nëse ju interesojnë faktet’, thuhet në postim.
