TIRANË – Kryeministri Edi Rama ka ndarë sot në rrjetet sociale pamje nga mbërritja e kroçerës turistike “MV Deutschland” në Portin e Durrësit, ku në bord ndodheshin 463 pasagjerë, shumica gjermanë, të cilët kanë zbarkuar në Shqipëri si pjesë e një turi kulturor nëpër Mesdhe.
Anija luksoze ka mbërritur në Durrës pas ndalimit në Portin e Vathit në Greqi, ndërsa ndalesa në portin më të madh të vendit është pjesë e një itinerari që vijon më pas drejt Kotorrit, në Malin e Zi.
Gjatë qëndrimit në vendin tonë, turistët do të kenë mundësi të vizitojnë disa nga pikat më të rëndësishme historike dhe kulturore, përfshirë qytetin antik të Durrësit, Kalanë e Krujës dhe Beratin, qytet i mbrojtur nga UNESCO.
Mbërritja e kroçerës është një tjetër sinjal pozitiv për turizmin shqiptar, që po përjeton rritje të ndjeshme, duke tërhequr vëmendjen e linjave ndërkombëtare të lundrimit dhe duke e pozicionuar Shqipërinë gjithnjë e më shumë si një destinacion atraktiv në Mesdhe.
