Pas deklaratës publike të Këshillit të Lartë Gjyqësor (KLGJ), Kryeministri Edi Rama ka reaguar në lidhje me qëndrimin e tij të mëparshëm për disa vendime gjyqësore që ai i cilëson si “skandalozisht brutale” dhe në “dëm të interesit publik”.
Në një postim në rrjetet sociale, Kryeministri thekson se e ka lexuar me vëmendje reagimin e KLGJ, duke theksuar se ky institucion “ka harruar se roli i saj themelor është të shqetësohet për cilësinë e drejtësisë dhe të garantojë publikun se vendimet që merren nga gjykatësit në dëm të tij nuk kalojnë pa u analizuar”.
Rama shton se:
“Gjykatësit nuk janë maliqër që bëjnë ç’të duan me ligjin në emër të pavarësisë.”
Ai kritikon qasjen e KLGJ-së, duke argumentuar se ky organ ka detyrimin të marrë seriozisht shqetësimet e palëve të prekura nga vendimet gjyqësore, veçanërisht kur këto vendime, sipas tij, “janë të ububushme për nga mungesa e ndjeshmërisë ndaj interesit publik”.
Megjithatë, Kryeministri shpreh dakordësinë me një pjesë të deklaratës së KLGJ, ku theksohet se “çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse”. Në këtë drejtim, ai thekson se:
“E kam informuar publikun se do të ndjekim këtë rrugë ligjore, duke iu drejtuar KLGJ-së dhe Inspektorit të Lartë të Drejtësisë.”
Në përfundim të reagimit të tij, Rama i bën thirrje anëtarëve të KLGJ të përqendrohen në misionin e tyre dhe jo në mënyrën si ai ushtron detyrën e Kryeministrit:
“Mos harxhoni kohën për të gjykuar se si e bëj unë punën për të cilën më ka votuar populli shqiptar… përqendrohuni tek puna juaj, që gjermësot lë shumë për të dëshiruar në funksion të Shqipërisë 2030 në BE.”
