Në 5 bashki të vendit po mbahen zgjedhjet e pjesshme vendore. 334.539 mijë qytetarë me të drejtë vote do të zgjedhin kryebashkiakët e rinj në Vlorë, Berat, Cërrik, Mat e Tepelenë, ndërsa për drejtimin e këtyre bashkive janë në garë 13 kandidatë.
Procesi i votimit po vijon normalisht në të gjithë vendin, me probleme sporadike. Vetëm 19% e qendrave janë hapur me pak vonesë, ndërsa në 3 QV pati probleme me mungesën e komisionerëve të PD, por situata u zgjidh. Në të gjitha qendrat po përdoret identifikimi elektronik pa probleme.
Deri në orën 11:00, sipas të dhënave nga KQZ kanë votuar 19330 qytetarë, ose 8.23% e zgjedhësve. Mati është bashkia me pjesëmarrjen më të lartë në zgjedhje (19.21%), ndërsa Vlora me pjesëmarrjen më të ulët (5.06%).
473 qendrat e votimit u hapën në orën 07:00 dhe qytetarët do kenë mundësi të shprehin vullnetin e tyre deri në orën 18:00. 13 kandidatët që janë në garë, votuan dhe u bënë thirrje qytetarëve që të marrin pjesë në proces.
Për mbarëvajtjen e procesit zgjedhor janë angazhuar 612 policë, të cilët kanë marrë në ruajtje edhe Qendrat e Votimit. Për herë të parë, në bashkinë e Tepelenës, do të aplikohet si test inteligjenca artificiale në numërimin e votave. Rezultati do të transmetohet online dhe do të ballafaqohet me numërimin manual të komisionerëve.
Fushata zgjedhore për këto zgjedhje kaloi në heshtje, pasi kandidatët i kanë zhvilluar takimet e tyre pa protagonizëm, ndërsa dy liderët e partive kryesore, Edi Rama dhe Sali Berisha nuk morën pjesë në asnjë miting.
Në këto zgjedhje, PD e Berishës dhe aleatët nuk kanë kandidatë të regjistruar në siglën e tyre, por kanë deklaruar mbështetjen për disa emra të cilët janë shpallur si të pavarur, të cilët do të jenë përballë 5 socialistëve por edhe disa emrave të tjera.
Mandati i kryebashkiakëve të rinj do të jetë vetëm një vit e gjysmë, derisa të mbahen zgjedhjet lokale në pranverën e vitit 2027.
Numri i votuesve sipas bashkive
Vlorë 171 895 votues
Berat 82 161
Cërrik 38 724
Mat 29 092
Tepelenë 12 667.
