Piku i sezonit turistik ka sjellë fluks të shtuar mjetesh në gjithë qarkun e Fierit. Sipas shefit të sektorit të Policisë Rrugore Fier, Rustem Plaka, akset më problematike mbeten Patos-Fier, Fier-Levan, Levan-Tepelenë dhe të gjitha akset rrugore që të çojnë drejt bregdetit si Fier-Seman, Fier-Darëzezë dhe Lushnje-Divjakë.
Plaka ka pohuar gjithashtu se përballë trafikut të rënduar janë marrë masa shtesë menaxhimin e situatës në të gjitha këto akse rrugore.
“Janë marrë masa me mjete inteligjente për konstatimin e të gjitha shkeljeve që prekin sigurinë rrugore, me shpejtësimatës, radarë”, thotë Plaka.
Masat e shtuara do të vijojnë deri në përfundimin e sezonit turistik.
Për aksin Levan-Tepelenë, është kërkuar që ARRSH të shtojë sinjalistikën rrugore.
Shefi i policisë rrugore thotë se masat s’mund të frenojnë plotësisht aksidentet, shkak i të cilave kryesisht është humbja e kontrollit të automjetit.
Plaka u bën apel drejtuesve të mjeteve që të respektojnë rregullat e qarkullimit rrugor, sidomos pas ndryshimeve të Kodit Rrrugor të cilat sjellin ndëshkime më të forta për shkelësit.
