Qeveria e sapo krijuar e Albin Kurtit ka vendosur një bllokadë të paprecedentë për qytetarët e Kosovës që duan të vizitojnë Shqipërinë. Dhe jo vetëm. Nga masat shtrënguese që hyjnë në fuqi ditën e sotme, pengohen edhe mjekët nga Kosova që do të vaksinoheshin në Kukës për të marrë dozat e para, apo të dyta.
Sipas vendimit, Kosova nga sot do të futet në një bllokadë të pjesshme për shkak të rritjes së rasteve me Covid.
Mirëpo Qeveria Kurti detyron përmes këtij urdhri që: Të gjithë qytetarët e Kosovës, gjatë hyrjes në Kosovë duhet të paraqesin vërtetim për test RT-PCR negativ të bërë më së largu 72 orë para hyrjes në Kosovë, në të kundërtën duhet të vetë-izolohen për 7 ditë. Përjashtim bëjnë qytetarët e Kosovës që kanë dalë jashtë Kosovës në 24 orët e fundit.
Kjo do të thotë se qytetarët e Kosovës që do të duan të vizitojnë Shqipërinë, qoftë edhe për të kaluar fundjavën, nuk mund të kthehen në shtëpitë e tyre pas 24 orësh pa kaluar kalvarin e shpenzimeve dhe sorrollatjeve për të sigruuar testin negativ.
Është e paqartë nëse vendimi ka të bëjë për të penguar vaksinimin e mësuesve në Kukës, por një ditë më parë Kurti deklaroi se Kosova nuk pranon vaksina nga vendet që nuk e kanë njohur duke refuzuar ndihmën e Shqipërisë me vaksinat kineze.
