Qëndrimi i Agjencisë Europiane të barnave nuk ka ndryshuar sa i takon vaksinës AstraZeneca. “Bilanci përfitim-rrezik mbetet pozitiv dhe vaksina mbetet e autorizuar për të gjithë popullatën”. Kjo është ajo që vetë EMA specifikon në një shënim duke iu referuar “keqinformimit” që rezulton nga një deklaratë e njërit prej ekspertëve të tyre, e keqinterpretuar dhe botuar në një gazetë.
EMA përsëriti qëndrimin e saj se AstraZeneca mbetet e autorizuar për të gjithë popullatën. “Gjatë fundjavës shumë artikuj u botuan që përmbajnë elemente dezinformimi në lidhje me vlerësimin shkencor, nga EMA, të vaksinës AstraZeneca, por pozicioni i EMA është i qartë: raporti rrezik-përfitim është pozitiv dhe vaksina mbetet e autorizuar për të gjithë popullatën”, thuhet në shënimin e EMA-s.
“Burimi i dezinformimit ishte një artikull i botuar në një gazetë italiane që citoi gabimisht një nga ekspertët tanë dhe për të cilin ne kërkuam një korrigjim zyrtar”, vijon shpjegimi i agjencisë europiane.
Shumë burime informacioni kanë botuar më pas artikuj mbi bazën e plotë të intervistës së pasaktë. “Në interes të informacionit të saktë bazuar në fakte, ju kërkojmë të përditësoni artikujt që përmbajnë informacion të rremë për të përsëritur në vend të kësaj pozicionin e pandryshuar të EMA në lidhje me vaksinën AstraZeneca. Nëse rekomandimet tona do të ndryshonin EMA do ta komunikojë këtë në një mënyrë transparente dhe pro-aktive për median dhe publikun. Gazetarët janë të ftuar të konsultohen në faqen tonë të internetit për çdo informacion të ri”, sqaron EMA.
Për Agjencinë Evropiane të Barnave (EMA), të katër vaksinat anti Covid-19 të aprovuara në Evropë janë të vlefshme. Të dhënat mbi raportin rrezik-përfitim janë gjithashtu pozitive për vaksinat e tjera vektoriale virale, atë të Janssen (Johnson & Johnson) dhe për dy vaksinat e bazuara në teknologjinë e dërguesit të ARN (mRna), përkatësisht ato të Moderna dhe Pfizer / BioNTech. Studimi klinik i vaksinës së kompanisë Curevac, me qendër në Gjermani, është duke u zhvilluar, i cili mund të vijë në ekzaminimin e EMA në fund të verës. Për Evropën mund të bëhet vaksina e pestë anti Covid dhe e treta për mRna.
Ndërkohë firma biotech në SHBA Novavax ka raportuar se vaksina e saj është mbi 90% efektive kundër Covid-19, duke përfshirë variantet e saj.
Ndërkaq ka mbërritur edhe nënshkrimi përfundimtar i institucioneve të BE mbi rregulloren që krijon certifikatën digjitale Covid të BE, e njohur gjithashtu si leje digjitale e Gjelbër, për të lehtësuar udhëtimin brenda Unionit.
