Shërbimi Spitalor dhe Klinik Universitar i Kosovës njoftoi më 11 gusht se 186 pacientë janë të shtrirë në klinikat ku trajtohen pacientët me COVID-19 – sëmundja që shkaktohet nga koronavirusi – dhe në spitalet e përgjithshme. Prej këtij numri, 136 pacientë janë të konfirmuar pozitivë me koronavirus. Dy prej tyre janë në gjendje të rëndë shëndetësore, ndërkaq 117 të tjerë po trajtohen me oksigjenoterapi.
Në Qendrën Klinike Universitare po marrin trajtim 95 pacientë. Klinika Infektive ka numrin më të lartë të pacientëve, përkatësisht 53, pasuar nga ajo e Pulmologjisë me 39 pacientë. Ndërkaq, në Klinikën e Pediatrisë janë tre pacientë. Sa u përket spitaleve rajonale, numri i përgjithshëm i pacientëve që po trajtohen është 72. Në spitalin e përgjithshëm të Gjakovës ka më së shumti pacientë, përkatësisht 29. Ditëve të fundit, në Kosovë është rritur numri i të infektuarve me koronavirus. Më 10 gusht, në vend u regjistruan 562 raste të reja dhe dy vik tima.
Zyrtarët e Institutit Kombëtar të Shëndetësisë Publike, kanë thënë se rreth 90 për qind të rasteve të reja janë të lidhura me variantin Delta të koronavirusit. Ky variant, që është më ngjitës, është duke u përhapur me shpejtësi në mbarë botën. Që prej marsit të vitit 2020, e deri më 10 gusht 2021, Kosova ka regjistruar 110.756 raste me COVID-19. Prej tyre, 2.273 pacientë kanë vdekur dhe 105.843 janë shëruar.
Raste aktive janë 2.158.
